Nongstoin, Jymmang, 26: Ia ka Workshop kaba shi sngi halor ka UNDRIP bad Sixth Schedule kaba hapoh ka project ‘Strengthening women’s voices in land resource governance’, la pynlong mynta ka sngi da ka GRASSROOT, Shillong hapoh Trysem Hall DC’s Office, Nongstoin.
Ia kane ka Workshop cum Seminar, la plie da u bah H.K.Thabah MCS bad ADC ka West Khasi Hills, ha kaba ka la long kaba shongkun bad don jingmut bha bad la wan ban iashimbynta da ki ophisar na baroh ki tnad treikam jong ka Sorkar hapoh District.
Ka kong Lyntiborn Marngar, Team Lead Grassroot lyngba ka power point presentation, ka la batai ia ka United Nation on Declaration for Rights to Indigenous People, kaba ia syriem bad don jingiadei bad ka khyrnit kaba 6, kaba pyni ba kumno ki trai muluk trai jaka (indigenous people) ki ioh ia ka jingiada na ka jingshah ban bein, jingshah niew bein, kumno ban pynkhlain ia ka rukom im bad ban tip ia ka hok jong ki.
Ka la batai bniah ia ka jingiapher hapdeng ki tribes bad ki trai muluk trai jaka, ha kaba ki tribes ki dei kiba phet na kawei ka jaka sha kawei pat. Katba ki trai muluk trai jaka ki dei ki trai jaka, ki don ka rukom im la jong bad kiwei kiwei. La ioh ruh ban pyni ia ka film kaba batai ia ka jinglong trai ki trai muluk ki trai jaka, ka jingdon ia ka iktiar halor ka khyndew ka shyiap.
Ha kane ka workshop la ioh ruh ban ia kylli ia ki jingkylli ha kaba la batai ruh ban ioh ia ka jingsngewthuh bad jing pynshai. La pynkut ia ka workshop da ka jingai khublei na ka kong Eulina Syiemiong, Administrator Grassroot, Shillong.
