Shillong, Naitung 01: Ka kynhun Tohkit ba la thung da ka tnat Housing kan sdang ïa ka jingleit jurip ban pynshisha ïa ka jinglong jingman jong tin Sopïing ha ki 7 tylli ki district jong ka Khasi bad Jaiñtia Hills ka ban sdang naduh ka 2 tarik u Naitung.
Kane ka la long hadien ba ka la don ka jingujor da ka Hynñiewtrep Youth Council (HYC) pyrshah ïa ka jingsam ïa ki tin kiba pohdor kaba hab hapoh ka Chief Minister Housing Assistance Program (CMHAP).
Ïa kane ka kynhun la ïalam da Joint Secretary incharge Housing department LC Marak kin sa leit ban jngoh ïa ki godown jong ki community and rural development (C&RD) block ha East Khasi Hills ha ka 2 haduh ka 9 Naitung, sha West Jaiñtia Hills ha ka 12 tarik, sha Ri Bhoi ha ka 13 tarik, ha Eastern West Khasi Hills bad West Khasi Hills ha ka 16 tarik, ha East Jaiñtia Hills ha ka 19 tarik bad ha South West Khasi Hills ha ka 20 tarik mynta u bnai.
U Marak ha ka shithi kaba 28 tarik u Jylliew la bthah ïa baroh ki district housing officer (DHOs) bad Block Development Officers (BDOs) ba kidei ban don ha la ki jong ki ophis ha ka por ba ka kynhun ka wan ban jurip ban lap ïa ki jinglong jingman jong kitei ki tin.
“Da ka hukum kaba 21 tarik u Jylliew, la thaw ïa ka enquiry team ban lap ïa ki jingshisha halor ki jingkynnoh jong katei ka sengbhalang halor ka jingsam ïa ki tin kiba tatdor kaba hapoh ka Chief Minister Housing Assistance Program (CMHAP) kiba ym dei kiba la pynskhem da ka Departmental Tender Committee halor ka NIQ invited/floated ha u snem 2022 ha kaba ïa kane jingshim la buh da ka ophis ka Directorate of Housing na ka bynta u snem 2022-23 bad 2023-24 na ka Hariana Iron Works Pvt Ltd Kolkata, West Bengal bad ba la pyllait sha ki district bad ki block headquarters,” u la ong ha ka shithi.
