Kiew ka um ha Bramaputra na ka jingther jong u lapbah lapsan ha kine ki khyndiat sngi

Shillong, Naitung 01: Ka jingther u slap ha kine ki khyndiat sngi ha Assam ka la pynkiew ïa ka um hapoh ka Wah Brahmaputra ha kaba bun ki jaka, ka jingtuid ka um ka la poi ha u dak ka jingma. Kane ka la ima ruh sha ka jingngam ïa palat 4000 hectare ka jaka rep kiba don ha ki 411 tylli ki Shnong jong ki 17 tylli ki Revenue Circle.
Katkum ka jingpyntip ka Assam State Disaster Management Authority (ASDMA), ka jingshlei um ka la ktah ïa kumba 1.34 lak ngut ki briew kynthup ïa 33,760 ngut ki khynnah ha ki 7 tylli ki District.
Kine ki District ki dei ka Kamrup, Karimganj, Dhemaji, Dibrugarh, Cachar, Tinsukia, bad Lakhimpur. Ka District ba shah ktah jur eh ka dei ka Cachar ha kaba haduh 67,030 ngut ki briew kila shah ktah bad la bud da ka Karimganj – 27,235 ngut, Dhemaji -25,947 ngut, Tinsukia – 9,868 ngut, bad Dibrugarh – 3,857 ngut ki briew.
Palat 11,000 ngut ki briew kila don ha ki 71 tylli ki jaka sah ba shi por bad ki jaka ai jingïarap ba la buh da ki bor District ha kine ki 7 tylli ki District.
Ha kajuh ka por, ka IMD ka la pynmih ïa ka jingmaham ba ha kine ki arsngi ba nyngkong u Naitung, kan don ka jingther u lapbah bad ka jingpom pyrkhat ha kiba bun ki jaka ha Assam.