Nongpoh, Jylliew 30: Uwei u rangbah u la mynsaw jur ïa lade hadien ba u la leit ban tynraj ïa uwei u kynja mawmer ka surok National Highway-6 ha Ri Bhoi ba hap ha ki bynta jong ka surok Umsning By-pass.
Kane ka la jia ha ka sngi u Blei ha ka por kumba 10.40 baje mynstep ha kaba u nongñiah Scooty ba la tip kyrteng kum u Hilarious Syiem, 44 snem ka rt kaba u la mynsaw jur bad ka Scooty ruh ka la julor.
La ïathuh ruh, ba une u rangbah u dang wan Nongpoh ban kiew sha Shillong bad sniewbok noh ynda la poi ha katei ka jaka, u la kum leit tynrah ïa utei u mawmer ka surok NH-6.
Ia une u rangbah la pynkit noh sha CHC Umsning ban ioh ïa ka jingsumar. Hynrei namarba la jur palat ka jingmynsaw la pynkit biang noh ïa u sha ki jaka ai jingsumar ha Shillong khnang ban ioh ïa ka jingsumar kaba kham paka.
Ki Pulit ka Ri Bhoi ki la hiar sha katei ka jaka ban pynlong ïa ka jingtohkit bad la iathuha uba mynsaw u dei uba sah ha shnong Mawiong, East Khasi Hills District. Kumba la lap da ki Pulit ha katei ka por, utei u rangbah u la don hapdeng ka jingbym tip briew shuh.
Ki Pulit ki ong hadien ka jingtohkit halor kane ka jingjia, ïa ka Scooty la pynkit noh sha Umsning Police Outpost.
