Jowai, Jylliew 26: Ka Jaiñtia Student Movement (JSM) Education Cell Western Region hapoh ka jingïalam khmat u samla H. Supuh Education Cell (WR) ha ryngkat ki nongkitkam ka JSM Jowai Circle kila ïoh lad ban leit ïakynduh ïa ka Principal jong ka Kiang Nangbah Govt. Higher Secondary School, Jowai halor ka jingduh klas jong ki khynnah pule haduh mynta.
Ha ka jingïakren bad ka seng naka liang ka Principal kala ai ka jingïaroh ïa ka JSM kaba la shim ka jingkitkhlieh ïa kane ka jingeh ki khynnah pule, kala pynsngew kumba long mynta hapoh ka Kiang Nangbah la dap lut ki seat nalor ka jingkhapniah jong ki kamra klas.
Shuh shuh kane ka jaka pule kala dep ban pdiang Admission ïaki khynnah pule haduh 400 tam haka Art Stream jong ka Day Session bad 400 tam haka Morning Session. Hynrei na ka liang ka Principal kala kular ban bishar bniah ïa kane ban wad ki lad ki lynti na ka bynta ka jingïoh rung klas ki khynnah pule kiba dang duh klas.
Ka seng hadien bala dep ban ïa kynduh ïa ka Principal na ka liang ki dkhot ka JSM kila ïoh lad ban leit ïa kynduh bad u DC ka West Jaiñtia Hills bad dawa ban pynbeit noh ïa kane ka jingduh klas jong ki khynnah pule khnang ba kin lait naka jingsepei jong ka por.
Na ka liang u DC ula ai ka jingïaroh ïa ka seng kaba la pynbiang ïa ki list jong ki khynnah Class-IX kiba dang duh klas haduh mynta, shuh shuh u DC ula kular ban shimkhia ïa kane ka jingeh ki khynnah pule hapoh ka District.
Ha ka juh ka por ka JSM Education Cell kala ban jur ïa ki bor pynïaid jong ki skul naduh ki Government School, ka ophis DSEO kumjuh ïa u DC ba kin shimkhia mardor ïa kane ka jingdawa jong ka seng.
Na ka liang ka JSM da buh ïa ka jingmaham lada kitei ki khynnah pule kim pat ïoh klas wat hadien bala dep dawa, ka seng kan sa shim da kiwei pat ki sien jam kiba kham tyngeh.
