La rakhe ïa ka sngi pyrshah drok ha EJHD da ka ophis DSWO bad ka tnat pulit na Khliehrat bad Umkiang PP

Khliehriat jylliew 26: Ka ophis jong ka District Social Welfare Officer, East Jaiñtia Hills District ha ryngkat ka jingïatreilang bad ka Mihmyntdu Community Social Welfare Association (MCSWA), kumjuh ruh ka tnat pulit jong ka Khlireiat Police Station bad ka Umkiang Patrolling Post ki la pynlong ïa ki prokram bapher bapher ban pynpna paidbah ïa ka jingsniew u drok, ïa ki prokram la pynlong ha Khliehriat, ha Deiñchynrum bad ha Holy Cross School Umkiang, kane ka long ruh ka jingrakhe ïa ka sngi pyrshah drok lane ka International Day against Drug.
Na ka liang ka Khliehriat Police Station myn ha ka 22 tarik sngi saitjaiñ ka la pynlong da ka jingialehkai football ha madan football ha Deiñchynrum, ka jingiakhun hapdeng ka Khliehriat Police Station bad ka Khliehriat Veterant Team, ha ka jingiakhun ba iaryngkat bor ki la ïa thep mar ar kol, ha kane ka sngi ha shwa ban sdang ka jingialehkai ki rang ïalehkai ki la rah ïa ki pla card kiba thoh ïa ki jingthoh ba pyrshah ïa u drok bad ki jingthoh kiba ai mynsiem ban ong ‘EM’ ïa u drok.
Katba ka tnat pulit jong ka Umkiang PP, mynta ka sngi jong ka 26 tarik ka la pynlong ïa ka prokram ha Holy Cross Umkiang, ha kaba u Officer Incharge jong ka Umkiang PP, u R.Das u la ai jingpynshai halor ka jingsniew u drok bad kyntu ruh ïa ki khynnah ba ki dei ban kiar na u drok ban long kiba khlaiñ ruh ha ka jingmut jingpyrkhat bad ban ong em ïa u drok, ha kane ka sngi u Principal jong kaskul Holy Cross Umkiang, u Fr. Francis Lamin ruh u la ai jingkren bad jingsneng jingkyntu ïa ki khynnah ba ki dei ban kiar na u drok.
Ha kane ka sngi, ka ophis jong ka District Social Welfare Officer, East Jaiñtia Hills District lem bad ka Mihmyntdu Community Social Welfare Association (MCSWA) ka la pynlong ia ka prokram ai jingpynshai ha Khliehriat Higher Secondary School, Khliehriat.
Kiba la ai jingkren ki kynthup ka District Social Welfare Officer, East Jaiñtia Hills District, ka kong R. Bareh, u Sub-Inspector, uba dei ruh u OC jong ka Khliehriat Police Station, u bah S. Buam, u Medical Officer In-charge of Oral Substitution Therapy (OST), Centre, Khliehriat, u Dr J. Nongtdu, ka Program Manager, MCSWA, ka kong R. Patlong, Jaintia Cluster Programme Manager, District Integrated Strategy for HIV/AIDs, u bah S. Tariang, u Assistant Public Prosecutor, u bah J. Pdang bad u Principal jong ka Khliehriat Higher Secondary School, Khliehriat, u Fr. J. Swer.
Ka kong R. Bareh ka la pynshai ba kane ka sngi, Day Against Drug Abuse and Illicit Trafficking la ju pynlong ha kaha 26 tarik u jylliew man la u snem bad la ju pynlong ïa ki prokram ai jingpysnhai halor ka jingsniew u drok uba ktah ïa ka longïing longsem bad ïa ka imlang ka sahlang, ka la ong ruh ba ka long kaba donkam ban ai ki jingpynshai bad pynsgewthuh ïa ki paidbah khamtam ki kynnah samla ba kin sngewthuh bad shemphang ïa ki jingsniew kiba mih na kaba pyndonkam drok.
U Sub-Inspector, u bah S.Buam u la kren bad pynshai halor ka Narcotic Drugs bad Psychotropic Substances (NDPS) Act, 1985 kaba dei ki kyndon aiñ kiba pynshitom katkum ka aiñ ia kiba pyndonkam drok kiba khaïi drok.
U Medical Officer In-charge of Oral Substitution Therapy (OST), Centre, Khliehriat, u Dr J. Nongtdu u la kren bad pynshai ia ki jait drok bapher bapher bad ki jingsniew kiba mih na kaba pyndonkam ïa u drok kaba ktah ïa ka ioh ka kot, ïa ka ïing ka sem bad ïa ka imlang ka sahlang.