Shillong, Rymphang 25: Ka kynhun ïalehkai phutbol jong ka Laitkor SC hynnin ka Sngi Saitjaiñ ka la lah ban pynliem noh ïa ka Nongrim Hills da 4-1 kol ha ka jingïaknieh ïa ka burom jong ka lympung phutbol kyrdan 1st Division ba la pynïaid da ka Shillong Sports Association ha madan First Ground, Polo, ban khylliap syndon ïa ka aïom lehkai mynta u snem kum ka lahduh.
Kumba ka paw naduh ba sdang ka Nongrim Hills ka la bteng ban bat hi dalade ïa ka kyrdan ba nyngkong ha ka miej kheiñ poiñ hynrei hadien ba ka la mad namrem ar sien lynter ka la pynlong ïa ka kynhun ban hiar sha ka kyrdan ba ar shadien ka Laitkor.
Shuwa ban jam sha kane ka jingïakhun final, na ka liang jong ka Nongrim ka donkam satang ban pynïakhaid ïa ka jingïalehkai namar ha ka bun kol (goal difference) ka la tam lypa ïa ka Laitkor.
Haba phai sha ka final, ka jingïakhun ka la long kaba itynnat bad kaba ïakhaid, bad haduh kaba kut ka 45 minit jong ka kylla step ym shym la don satia ba lah ban pynïakhlad ïa ka jingïakhaid.
Dei hadien katto katne minit ba la ïaid ka kylla kaba ar ba ka Laitkor ka la sdang ban pynkhihjar lyngba u Evangel Kharkongor (49′ minit). Nangta ka kynhun ka la nang pynskhem shuh shuh ïa ka jingkyrmen ban rah namlahduh da kaba pynbud sa lai kol kiba la thep da u Sondy F Kharkongor (63′ minit), u Risuklang Malngiang (66′ minit) bad na u Ryngkat Yanni Ryngksai (79′ minit).
Na ka liang jong ka Nongrim Hills ka la ïoh ban pynphai shi kol na u Justerwell Tham (79′ minit) hynrei ka por ka la lyngkot eh ïa ka kynhun ban pynphai haduh lai kol ban ïakhaid ha kaba ka la shah rem noh da 4-1 kol.
Watla kata ruh, baroh ar kynhun kiba la wan kyrdan hakhmat jong ka miej ki la pynthikna ïalade ban shah kyntiew kyrdan sha ka lympung lehkai jong ka Shillong Premier League. Ha kawei pat ka liang, ka Umphyrnai SC bad ka Mawkhar SC, ki ar kynhun ba don shatraiduh jong ka miej, ki la shah pynhiar sha ka kyrdan Second Division ha ka samoi ban wan.
Ka kynhun ba la ïohrah ïa ka namlahduh ka la ïohpdiang ïa ka song-tyngka kaba haduh 1 lakh katba ka kynhun ba wan kyrdan ba ar ka la ïohpdiang 50,000 tyngka.
Haba phai sha ka Laitkor, la ar sien lynter ka la lah ban kyntiew kyrdan ïalade. Kumban shu pynkynmaw, kane ka kynhun ka la ïohrah ïa ka burom kum ka lahduh ha ka Second Division ha u snem 2022 bad ka la bteng ban rah sa ïa ka burom ha ka kyrdan ïakhun 1st Division. Kaba dangsah mynta ka long tang ïa ka SPL, ka ban dei ruh ka samoi ba nyngkong ïa kane ha kane ka lympung.
Katba na ka liang jong ka Nongrim Hills, kan sa ïoh biang ban wanphai sha ka kyrdan ïakhun SPL – ka lympung ba ka kynhun ka la ïohrung teng ha u snem 2019 hynrei shah sloit noh tang hadien ba la kut ka samoi.
