Shillong, Rymphang 18 : Ka Joint Movement Committee for Corridor (JMCC) ka la kyntu ïa ka sorkar pdeng ba kan tuklar lang na ka bynta ban pynkhie im biang ïa ka jingïaid ka liengsuiñ ATR-72 na Tura sha Balurghat ter ter sha Kolkata – Delhi bad shaduh Bangalore.
Ha ka shithi ba phah dang shen sha u Myntri ka tnad Civil Aviation u Jyotiraditya M Scindia, u Convener jong ka Committee u Dr. Naba Kumar Das u la ong, “Da kaba bteng ïa ka jingdawa kaba la slem bha ban pynkhie im biang ïa ka jingïaid biang ka liengsuiñ na Balurghat Airport na bynta ka bit ka biang jong ki paidbah ka North Bengal bad ki jylla ka thaiñ shatei lam-mihngi jong ka Ri ban kham suk ka leit ka wan na Tura sha Balurghat bad nangtei pat sha Kolkata, Delhi bad Bangalore, ngi la buh biang ka jingkyrpad ban pynim biang ïa ka Balurghat Airport kaba treikam naduh ki snem 1949 haduh u snem 1960 kaba don ka leit ka wan kaba man ka sngi kynthup naduh ka Air Transport, Skyplies bad Surekha Transport.”
Shuh shuh la ong ruh ba ba kitei ki liengsuiñ ki ïaid na Balurghat Airport badn pynïasoh pat bad ka leit ka wan na Tura ha Meghalaya bad nangtei pat sha Kolkata, Delhi bad Bangalore.
U ong ruh ba ka leit ka wan lyngba ki liengsuin ka long kaba donkam bha ban kan kham suk ruh lyngba ka Balurghat ban pynïasoh ïa ki bynta jong ka North Bengal bad ki jylla ka thain shatei lam-mihngi jong ka Ri.
Nalorkata, u ong ruh ba da ka jingsdang biang ïa katei ka rukom kamai kan kyntiew ym tang ïa ka ïoh ka kot ha ka thain hynrei ha ka ri baroh kawei bad kan iarap ruh wat ban kyntiew ïa ka pule puthi, bad ka rukom im kumjuh. Katkum ka jingong jong u, kaba sah mynta ka long sa tang ban pynheh ïa ka runway haduh 1900 mitar ïa ka Balurghat Airport.
La ong ruh ba ka Balurghat Airport kadei ka kad liengsuiñ kaba kongsan bha na ka bynta ka ïoh ka kot bad la shu ieh shrah kumta la kumba 64 snem ei ei.
“Kumta ngi kyrpad ïa phi ba phin pyrkhat lem an ka bynta ban pynkhie im biang ïa ka Balurghat Airport bad pynkhie im biang ïa ka leit ka wan lyngba ki liengsuiñ ha kitei ki jaka na bynta ka jingmyntoi ki paidbah jong ka ri,” u la bynrap biang ha katei ka shithi.
