Nongpoh, Rymphang 14: Ha kawei na ka jingjia ba sngewsih kaba la jia hynnin ka sngi ha ka Shnong Umran Dairy ha Ri Bhoi, kawei ka Longkmie ba la 52 snem ka rta ka la duh noh ia la ka jingim ba kordor, kaba dei hadien ka jingshah lympat ha ka bording ilektrik katba ka dang leit wad jhur khlaw ha kawei ka khlaw kab ba don hajan ka shnong Umran Dairy ha Ri Bhoi.
Kane ka jingjia ka la jia ha ka por mynsngi, ha kaba katei ka Longkmie ba la tip kyrteng kum ka Kong Edwina Lyngdoh Lyngkhoi ryngkat ka khun ka kong Rimonlang Lyngdoh Lyngkhoi, ki la leit lang ban wad jhur khlaw na katei ka khlaw ba don hajan ka shnong Umran Dairy bad khlem poi pyrkhat katei ka longkmie ka la duh noh ia la ka jingim na ka daw ba ka la kum leit ïuh ia u sinar ilektrik ba ha la hap ha khyrdep ba pyniaid na katei ka khlaw.
Halor kane ka jingjia, la pyntip da katei ka khun ba ka la lap hadien ba ka kmie ka la shah bat ha ka bording iletkrik na ka jingleit ïuh ia utei u sinar ilektrik hadien ba ka la ioh sngew ia ka jingsawa bad hadien ba la poi ha katei ka jaka la lap ba ka kmie jongka, ka la shah bat bad shah lympat ha ka bording ha kaba ka lah shuh ban leh e ei.
Kum ka khun ka la pyrta briew bad pan ka jingiarap na ki nongshong shnong bad hadien ba la poi ki nogshnong shnong ha katei ka jaka kim lah shuh ban leh ei ei, haduh ba katei ka longkmie ka la duh syndon ia la ka jingim ba kordor.
Ha kaba ia dei bad kane ka jingjia ba sngewsih, u Rangbah Shnong ka Umran Dairy, u Bah Lambor Mukhim Bina, haba kren sha ki Nongthoh Khubor, u la ong ba kum ka bor shnong ka pynpaw ia ka jing sngewkhia kaba jur halor ka jingduh noh ia kane ka longkmie kaba la shah bat ha ka bording ilektrik bad ka shnong ka phah ruh ka khubor sngewlem sha kiba haïing hasem kiba la duh noh ia la ka kmie.
Ha kawei ka bynta, kum u rangbah shnong, u la ong ba ka bor shnong ka kyrpad ia ka tnad MeECL ba kan tohkit bha halor kane ka jingjia bad ha kawei ka bynta u la kyprad ruh ia ka tnad MeECL ba ka dei ban pynkhuid ia ki sainar iletrik kiba iaid na ki khlaw khnang ba kum kine ki jingjia kin nym jia bad ruh ka long ka jingshngaiñ ia ki paidbah nongshong shnong hi baroh kawei.
