Ka Meghalaya Games kaba 5 ka la sdang ha nongbah Tura ha 15 tarik u Kyllalyngkot 2024. Ka long ka burom ia ka jylla ba ïa kane ka rynsan ïalehkai ki Samla na ki District bapher bapher ka jylla la wan plie da ka President jong ka ri India, ka Droupadi Murmu. Kadei ruh ka sien kaba nyngkong ba ïa kane ka lympung ïalehkai la pynlong ha Rilum Garo.
Ka sorkar jylla lyngba ka Sports and Youth Affairs Department ka la mang kumba 20 klur tyngka ban pynlut na ka bynta kane ka Games. Lada peit ha ki rynsan Social Media ka jingpynkhreh ka long kaba la itynnad shisha, khamtam eh ia ki jingpynbna paidbah ne ka Publicity, naduh ki flex, ki video ne ki teaser bad kiwei kiwei de ki jingpynsaphriang shaphang ka Meghalaya Games 2024. La ïohi ruh ba ka jingthang ne rah ia ka dongmusa ne ka flame jong ka Games ka la ïaid bun tylli ki District bad la aiti ha uwei u nongïalehkai Sports bad pawnam jong ka jylla, u Bah Bening Lyngkhoi, uba long u nongïamareh marathon jong ka jylla.
Ka jingthmu jong kane ka lympung ka long ban sei ïa ki sap jong ki samla, ki samla rit ha ki jingïalehkai bapher bapher khnang ba kin ïoh ïa ka lad ban leit ïashim bynta ha ki rynsan kiba kham sha jrong kum ki National Games bad ki National Level. Ka jingthmu kaba dang biang palat.
Hynrei haduh katno ka jylla ka la lah ban organize ia ka jingïalehkai kaba heh kat kane, lane hato ka Meghalaya State Olympic Association ka la don ne em ki briew kiba tbit kiba la lah ban pyn9aid ïa ka lympung kaba bun briew kat ka Meghalaya Games. Hato ka don ne em ka man power kaba biang?. Lane kiba don ruh ki trei hok ne em ïa ka kam kaba la bynshet ha ki?.
Haba peit na ki jingmih khubor ha ka sngi ba sdang ka MG 2024, ka paw ba ki dang bun ki jingduna. Balei la ong kumta. Khyndiat por hadien ba ka President Murmu ka la plie ïa ka MG- 2024, kiba bun ki nongïalehkai ki la ujor ba kim shym la ioh bam ha ka por kaba biang. Kiba la ïoh ruh ki ïoh ym da ka bam kaba ki ju bam ha ka por sngi, hynrei ki la ïoh kum ki jingbama ba dih sha sngi.
Kane ka la pyndom ïa kiba bun ki kmie ki kpa bad don kiba la byrngem ban leit shaw noh ia ki khun jong ki, namar kim sngew iahap ba ki khun ba leit iashim bynta ha ka jingïalehkai Sports kin hap ban shah thngan bun kynta. Ki nongpynïaid ïa ka MG-24 ki la aid aw ba ka jingslem ka bam kadei namar ka jingpyrkhing ïa ka leit ka wan namar ka jingwan ka President ban plie ia ka MG-24.
Ka Meghalaya Games kam pat lait na ki kynrum kynram kiba kum kine. Ha ka Meghalaya Games kaba la long ha ki snem baladep ha Shillong, kiba bun ki jingujor ki la wan khamtam eh haba ki nongïalehkai ki la hap sah ha ki kamara kiba jakhlia, nangta ki kamra kiba jaw um bad ka bam ruh ka bym biang.
Kane ka pyni ba ka Meghalaya Games kam pat lah satia ban ai jinghun ïa ki nongïalehkai. Te lada kat ïa ki nongïalehkai ym lah ban pynbiang, hato don jingmut aiu ban pylong ia ka Meghalaya Games. Hato kan kyntiew ne kan pynhiar pynban ïa ka Sports ha ka jylla.
Ka jingmang kaba 20 klur tyngka, kam dei shuh ka pisa kaba rit. Hynrei kumba ju long ha kane ka jylla ba na ki rynsan ne ki lympung kiba kum kine, kan kyntiew pynban ia ka spah jongno re jongno ha jaka ba kan kyntiew ia ka Sports ha ka jylla.
