Ka District Council kam dei na ka bynta ka skhim, hynrei na ka bynta ka jaidbynriew

Shillong, K’Lyngkot 12 : U Bah Process T Sawkmie, MLA barim u pynpaw ïa ka jingsngewkhia ban ïohi ïa ka District Council ha ka jaka ban ïakren ïa ki ishu ban ïada ïa ka ri bad ka jaidbynriew, ban pynkhlaiñ ïa ki kolshor, ki it ki hima, hynrei ki ïa kren pynban ïa ki skhim.
U pynpaw ba ka bynta jong ka District Council ka long na ka bynta ka ri bad ka jaidbynriew, ban ïada ïa ka kolshor, ïa ki identity ne jingithuh jong ngi, ban pynkhlaiñ ïa ki it ki hima, ki khaïi pateng, ki riti synshar ha ki hima, ha ki dorbar shnong, ha ki syiem bad ban pynthikna ba ka mynsiem ieit jaidbynriew ka dei ban rung ha ki khun Khasi Khara, hynrei ym ban kren ne ban sam skhim.
“Ngi ïohi ïa ka jingsynjor jong ka kolshor jong ngi, kumta ngi donkam ban ïada bad ban pynskhem ïa ka,” ong u bah Sawkmie.
U ong ruh, ka bynta jong ka District council ka dei ban pynkhlaiñ ïa ka Sixth Scheduled ne Khyrnit ba hynriew, namar ha kine ki sngi ki don kiba kwah ban pynkylla noh ïa ka bynta jong ka District Council.
“Hooid ngi donkam ïa ki skhim bad ki kam pynroi, ka sorkar jylla ka don ban peit ïa kata, naba ka District Council kumba ka long mynta ka ïa trei ryngkat bad ka sorkar jylla,” bynrap u bah Sawkmie.