Shillong, Jymmang 16: Ka All India Trinamool Congress (AITC) kala jakhom khait mynta da ka jingphla u Myntri Rangbah ka Jylla Conrad Kongkal Sangma ba haduh 7 ngut na ki 12 ngut ki MLA jong kane ka Party, kila pan ïa ka ticket jong ka NPP ban ïakhun ïa ka elekshon MLA 2023.
U Myntri Rangbah ka Jylla uba dei ruh u National President ka NPP, ula phla ïa kane ka jingjia ha ka jingïalang paidbah jong ka NPP ba long hynne ka sngi nyngkong ha madan Rongjeng.
“Napdeng ki 12 ngut ki MLA ka Congress kiba la iasoh sha ka AITC, 7 ngut kila wan ïakynduh ïa nga bad pan ticket na ka NPP ban ïakhun ïa ka elekshon MLA 2023” sei madan u Conrad haba pyntip ba um pat kwah satia ban ai kyrteng ïa kine ki MLA namar ba ki dang don ha ka Liang Pyrshah bad lah ban shah khring ha ka aiñ mait kyrteng (anti defection) lada mih noh mynta.
“Hynrei ki briew ha surok, ha ki jaka iew kila dep tip kiei kita ki MLA ki ban sa mih noh na ka AITC” ula ong.
Haba pynrem ïa ki Nongïalam jong ka Trinamool namr kane ka jingkwah phet seng ki MLA, u Conrad ula ong “Na ki 12 ngut ki MLA ba wan iasoh, bun tam kin nym don shuh bad ka Trinamool”.
Hynrei u Myntri Rangbah ula ong pat ba watla kine ki 7 ngut ki MLA ka AITC ki kwah ban ïakhun ïa ka elekshon na ka ticket jong ka NPP hynrei ka party kan nym ai jaka satia ïa ki namar kala don lypa ïala ki jong ki Kyrtong ha ki katto katne ki Constituency jong ki.
“Ngi lah ban nym ai ticket ïa baroh kiba pan ticket namar ngi la don lypa ïala ki jong ki kyrtong” ong u Conrad.
