Jowai, Nohprah 10: Ka jingïalehkai phutbol Semi Final haka kyrdan Super Division Football Tournament 2023 bala ai kyrteng ‘U Kiang Nangbah Memorial Trophy 2023’ ïa kaba la pynïaid daka West Jaiñtia District Sports Association, (WJDSA) Jowai kaba la long hynnin ka sngi Saitjaiñ jong ka taïew ba ladep ha madan Kiang Nangbah Stadium, Dongmihsngi Jowai.
Haba phai sha ka jingïakhun Semi Final kaba lai na ka liang jong ka kynhun ïalehkai ka 7 Wasa United kala lah ban pynliem da 2-1 kol ïa ka Sailung Ialong ban khur ïa ka namjop bad ban jam sha ka jingïakhun final ha kane ka lympung.
Ka 7 Wasa United ka la ïoh ban lamkhmat nyngkong lyngba ka shi kol na u Niponghi Sumer haka minit ba 11 ban lamkhmat ïa ka kylla step.
Na ka liang jong ka Sailung Ialong ka la ïoh ban pynïakhaid ha ka minit ba 50 lyngba u Soniroy Suchiang.
Ka jingïalehkai ka la long kaba itynnat bad kam shym la shimpor ïa ka 7 Wasa United ban ïoh lamkhmat biang ïa ka jingïakhun lyngba ka kol kaba ar na u Risanlang Dkhar haka minit ba 52.
Lyngba kane ka jingjop ka 7 Wasa United kan ïakhun pyrshah ïa Ladthadlaboh haka phainal jong kane ka lympung ban ïaknieh ïaka nam lahduh mynta u snem.
