Ka jingnangjah nangjah jong ka riam tyngrai katba nangmih ki sngi ka pyni ia ka dak ba ka jaidbynriew Khasi ka la nangduk nangduk katba nangmih ki sngi. Ka jingduk kam dei tang ha ka liang ka spah ka phew hynrei ka dei ha ka liang ka akor ka burom kaba phalang ha ka riam tynrai la jong. Kiwei kiba nabar kim lah satia ban ithuh ia ki samla khasi namar ba la ibeit kum ki nongshong shnong jong ka asia ba shathie (south asian) ha ka riam ka beit jong ki. Ki samla ki lah lehse ban sngew sarong bad kham sngew kyntnied ban ioh riam pyrthuh nongwei, hynrei ka dak jong ka jinglong tynrai ka la nangjah rngai katba nangmih ki sngi. Shano kein kane kan ialam, niuma ka Globalisation ne kata ka jinglong kawei ka pyrthei ka la treikam, hynrei ka jaidbynriew ka la nangtlot bad nangduk katba nangmih ki sngi. Lah ban ong ba mynta hi ym lah shuh ban iohi ia ka jaidbynriew hapdeng ki samla lait noh tang ki longkmie ba la kham rangbah, wat na kine ruh la bun kiba iatynneng nongwei lut.
La jia aiu ia ka akor burom kaba la iaroh eh hapoh ka ri India bad ruh hapoh ka jylla Meghalaya. Hapdeng ki ri ka pyrthei la ithuh ia ka India kum kawei na ki ri kaba don burom kumjuh ruh ka jylla Meghalaya bad khamtam ka jaidbynriew Khasi la tip kum ka jaidbynriew tip briew tip blei. Hynrei kane rynjain mynta pat ka dap tang da ki kam leh jubor khamtam eh ai ki kynthei, khynnah bad ruh ki longkmie kumjuh. Ka long kaba isaitmet ban iohi ia ka jingkiew stet jong kane ka kam sniew bad kat kum ka National Crime Record Bureau (NCRB) ha India.
Kum shi bynta ban phai dien pat sha ka jingshah lehbein jong ki kynthei la iohi ba ha u snem 2008 kitei ki kam leh jubor ki la jyllei shisha haduh ba ki la pynsuhjer ia ki kynthei. Ha ka jaidbynreiw Khasi ka jingshah lehbein jong ki kynthei ka dei hi ka jingshah lehbein jong ka jaidbynriew, namar ba ki kynthei la niew ia ki ba ki dei ka burom ka ijot jong ka jaidbynriew. Hynrei ka long kaba sngewjli ban pyrkhat ba mar ia sdang u 2009, ha ka 1 tarik u Kylla lyngkot, kawei ka longkmie ka la shah rahbor bad shah leh beijot ha palat 5 ngut ki riew runar ha ki thain ka Mawlyndep. Kumjuh ruh kawei ka samla pule MBA ka la shah leh beijot ha 10 ngut ki runar ha ki thain jong ka Noida ha ka 5 tarik mynta u bnai. Ki TV channel ki niew ia kane ba ka dei kawei na ki kam ba lehrain eh ka ri India.
Ka la don ka jingiamir jingmut kaba jur bha jong ki kynthei bad wat ki riew ain hapoh ka ri halor jong kum kitei ki jingjia bad kumno ban wanrah ia ki lad ki lynti ban teh lakam ia ka. Haba ianujor bad kiwei pat ki jingjia ha kiwei pat ki bynta jong ka ri ne ki jylla, ym lah ban len ka jylla Meghalaya kaba dang don tang shi troh ka jingbun briew ka la roi bha ha kine ki kam sniew. Kumta ka sorkar lyngba ka tnad pulit ka donkam bah thaw shisha ia ki ain kiba kham khlain na ka bynta ban iada na ka jingshah thombor bein jong kiba lui lui. Hynrei ha ka juh ka por ka imlang sahlang ka dei pat ban long kaba peitngor. Ban tip khambha ia ka jingroi palat jong kane ka kam ka long kaba donkam ban iit bniah ne survey ia kiei ki daw kiba la kha roi.
Hooid ki kynthei ki sngewthuh eh ia ka jinglong ba kyrpang bad ba laidluid jong ki ha ka imlang sahlang, hynrei lada iit ia ka tynrai tharai ki shynrang kin lah ban ai ai ka jubab kaba kham paka kaei ka daw kaba la pynlong ban pynjia ia ki kam leh jubor. Ym lah ban len hi ruh ba ka rukom im briew man briew ha kine ki sngi katba nangstad katta ka nang synjor bad ba ka akor ka burom ruh ka nanghiar. Katba nang pyrthuh bud ia ki nongsepngi kumta ruh ki kam sniew ki nangroi kum sha ri sepngi. Kiba bor kiba peit ia ka ain kum ki pulit kiba donhok ban tohkit halor ki jingjia kin lah ban batai khambha ia kaei ka daw kaba kito ki nongleh kam sniew ki shlur ne ki brai ban leh ia ki kam pohjait. Hato ka dei ka riam ki kynthei kaba pynbrai, ka jingpeit phlim palat, ka jingpeit ia ki kot khlem akor, ka jingkyrni dih drok, ka jingsynjor ka jinglongshynrang, ka jinglehkput ne kiwei pat ki daw.
Iwei i longkmie ki la pynpaw ba ka riam jong ki samla kynthei ka dei kawei kaba i mutsniew (suspect) ba kadei kawei na ki jingkhang sha katei ka kam. Kiba riew spah ki riam bad kiew beit ha ki kali la jong ban leit ban wan. Kiba hapdeng ruh ki riam bad kiba duk eh ruh ki riam bad ki iaid laitlan kum ki paidbah hi. Hynrei kaei kaba sngewsih ka long na kum kine ki jingmutsniew (suspect), kiba ngat pat ha ka apot ki dei kito kiba lui lui kiba ym don ki lad jingiada. Hooid sngewtynnad ban iohi ia ka jingiamir jingmut jong kito kiba la nang la stad halor katei ka phang, hynrei ka don ruh kaba donkam ban shim lang ia ka jingai jingmut jong ki longkmie kiba ieit ia ka burom ka akor Khasi la jong. Ha kaba kut ka riam khyllah than ym tang ba ka wanrah ia ki soh pyut, hynrei ka wanrah ruh ia ka jinglong duk jong ka jinglong tynrai ne ka Identity jong ka jaidbynriew.
