Pynjulor ka hati ïa ki jingthung jingtep ha thaiñ Shallang bad Shyrkon
![](https://mawphor.com/wp-content/uploads/2022/05/mawphor-1.jpg)
Nongstoiñ, Naiwieng 15: Ha kine ki khyndiat sngi, kawei ka Hati ka la wan poi sha ki shnong ki thaw ha ka shnong 5 kilo Kyllon Mathei thaiñ Shahlang bad ha ka shnong Photjalei kawei na ki shnong ha ka thaiñ Shyrkon, ha kaba ka la pynjot lut ïa ki jingthung jingtep kynthup naduh u Synsar bad kiwei kiwei bad la ong ruh ba ka la bam lut ïa u Kba.
Ha ka jingïakren bad u bah Kitboklang Sangriang sordar ka shnong Photjalei, u la ong ba u ithuh ba katei ka mrad kam dei satia ka Hati khlaw, hynrei ka dei kaba la ri da u briew. Pynban kat haduh mynta mynne ym pat don satia kiba la wan kam trai ïa ka. Ki nongshong shnong ki la sheptieng jur namar ka la pynjot lut ïa ki pynthor kba bad wat haba la leit kawang da ki bom bula ruh kam shym la phet satia.
U sordar u la kyntu ruh ïa ki trai ba kin wan shaw noh, lym kumta ka shnong kan ym don ka jingkitkhlieh lada jia ei ei, namar lada jia ba ka Hati kan leh eiei ne pynmynsaw ïa ki briew kan long ka jingsngewsih.