Pyllait paidbah u Narendra Modi ïa ka PM-JANMAN kaba 24 hajar klur
![](https://mawphor.com/wp-content/themes/mawphor/images/default-thumb/publisher-lg.png)
Delhi, Naiwieng, 15: U Myntri Rangbaduh ka ri u Narendra Modi u la ai jingkren ha ka prokram kaba rakhe ïa ka Janjatiya Gaurav Diwas, 2023 ha Khunti, Jharkhand. Ha kane prokram, u Myntri Rangbah Duh u la pyllait paidbah ïa ka ‘Viksit Bharat Sankalp Yatra’ bad ka Pradhan Mantri Particularly Vulnerable Tribal Groups Development Mission. U la pyllait paidbah ruh ïa ka bynta jingsiew ba 15 jong ka PM-KISAN. U Modi u la buh maw nongrim bad aiti sha ka ri ïa ki projek ha Jharkhand kiba shongdor haduh T 7200 klur ha ki kam bapher bapher kum ka rel, surok, pule puthi, dewiong, Petroleum bad Natural Gas. U la leit jngoh ruh ïa ka exhibition ba la pynlong ha kane ka sngi.
La pyni ruh ïa ka khubor jong ka President jong ka India, ka Droupadi Murmu lyngba ka video ha kane ka prokram.
U la ïalam ruh ïa ka jingbam smai Viksit Bharat Sankalp ha kane ka prokram.
U u la sdang ïa ka jingai jingkren jong u da kaba kynmaw ïa ka jingleit jong u sha ka shnong Ulihatu, ka jaka ha kaba la kha ïa u Bhagwan Birsa Munda bad ruh sha ka Birsa Munda Memorial Park cum Freedom Fighter Museum ha Ranchi mynta ka sngi. U la kren ruh shaphang ka jingpyllait paidbah ïa ka Freedom Fighter Museum ar snem mynshuwa ha kane ka sngi. U Modi u la ai khublei ïa baroh ki briew jong ka ri ha kane ka Janjatiya Gaurav Diwas. U la ai khublei ruh halor ka sngi ba la thaw ïa ka Jharkhand bad u la kdew sha ki jingnoh synniang jong u Myntri Rangbah Duh ba rim, u Atal Bihari Vajpayee ha ka jingsdang jong kane ka jylla. U la ai khublei ruh ïa ki briew jong ka Jharkhand halor ki projek ka roi ka par ha ki kam bapher bapher kum ka rel, surok, pule puthi, dewiong, Petroleum bad Natural Gas ïa kiba u la buh maw nongrim. U la ong ba u dap da ka jingkmen ba baroh ki lynti rel ha Jharkhand mynta ki dei kiba ïaid da ka bording elektrik.
Ha ka jingkren jong ki jingeh kiba u Bhagwan Birsa Munda u la ïakynduh na ka bynta ka burom jong ki riewlum, u Myntri Rangbah Duh u la ong ba ka Jharkhand ka don jingïadei bad shibun ki riewkhraw kiba dei ki riewlum. U la kren shaphang ki riewkhraw kum u Tilka Manjhi, Sidhu Kanhu, Chand Bhairav, Phulo Jhano, Nilambar, Pitambar, Jatra Tana Bhagat bad Albert Ekka kiba la wanrah burom ïa kane ka jaka. U Myntri Rangbah Duh u la ong ba ki nongïakhun Adivasi ki la ïashim bynta ha ka jingïakhih na ka bynta ka jinglaitluid ha baroh ki bynta jong ka ri bad u la jer kyrteng ïa u Govind Guru na Mangarh Dham, Tantya Bhil na Madhya Pradesh, Bhima Nayak, Martyr Veer Narayan Singh na Chhattisgarh, Veer Gundadhur, Rani Gaidinliu na Manipur, Veer Ramji Gond na Telangana, Alluri Sitaram Raju na Andhra Pradesh, Rani Durgavati na Gond Pradesh. U la ong ba kine ki riewkhraw kim shym la ïoh ïa ka jingithuh ba ki dei ban ïoh bad kumta, u la ong ba u kmen bha ban kynmaw ïa kine ki riewkhraw ha ka Amrit Mahotsava.
Ha ka jingkren shaphang ka jingïadei jong u bad ka Jharkhand, u Modi u la kdew sha ka Ayushman Yojana kaba la plie paidbah na Jharkhand. U la ong ba ar tylli ki sienjam ba khraw ki dei kiba plie paidbah na Jharkhand mynta ka sngi. Kaba nyngkong ka dei ka Viksit Bharat Sankalp Yatra ka ban ïarap ban pynurlong ïa ki thong jong ka Sorkar bad ka PM Janjati Adivasi Nyaya Maha Abhiyan ka ban ai jingïada ïa ki riewlum kiba don ha ka jingma ban duh jait.
U Modi u la ban jur halor ka jingdonkam ban peit bniah ïa saw tylli ki ‘Amrit Stambh jong ka Viksit Bharat’ lane ki rishot jong ka India kaba la kiew shaphrang kiba long ka bor ki longkmie ne ka Nari Shakti, ki nongpynmih mar bam jong ka India, ki samla jong ka ri bad ki briew ka India kiba pdeng bad duna ka ïoh ka kot. U la ong ba ka jingstet ka roi ka par ha India ka shong ha ka jinglah ban pynkhlaiñ ïa kine ki saw tylli ki rishot jong ka roi ka par. U Modi u la ong ba u sngew hun halor ki sienjam bad ki kam ba la pyndep ban pynkhlaiñ ïa kine ki saw tylli ki rishot ha kine ki 9 snem ba la dep jong kane ka Sorkar.
U la kren shaphang ka jingjop jong ka Sorkar ban pyllait ïa palat 13 klur ngut ki briew na ka jingduk. “Ka seva kaal jong ngi ka la sdang haba kane ka Sorkar jong ngi ka la wan ha ka bor ha u snem 2014,” u la ong da kaba bynrap ba ki don shibun bha ki briew ha ka ri ki bym shym la ïoh ïa ki jingshakri. U la ong ba ki ba duk ba suk ki la duh jingkyrmen namar ka rukom treikam torti jong ki Sorkar ba mynshuwa. “Kane ka Sorkar mynta ka la sdang treikam da ka mynsiem jong ka jingshakri,” u la ong da kaba bynrap ba ki ba duk ba suk bad ki ba shem jingeh ki la dei kiba kongsan tam jong kane ka Sorkar kaba la pynpoi ïa ki jingshakri sha ki jyngkhang iing jong ki. U la ong ba ka dei ka rukom treikam jong kane ka Sorkar kaba la wanrah ïa ka jingkylla. U Myntri Rangbah Duh u la pyntip ba shuwa u 2014, ka jingkhuid ha ki shnong ka long tang 40% katba mynta, ka ri ka thew ban pynpoi lut sha baroh ki jaka. Ha ka jingkren shaphang ki jingjop hadien u snem 2014, u Myntri Rangbah Duh u la kren shaphang ka jingdon ki connection LPG kaba la kiew na ka 50-55% ki shnong sha kumba 100% mynta, ka jingai ïa ki dawai tika ïa ki khynnah khyllung ka la poi sha ka 100% na ka 55%, ki longiing kiba ïoh um kor ki long 70% na ka 17% hadien ba la ïoh jinglaitluid ka ri. “U Modi u la peit bniah ïa kito kiba shem jingeh,” u la ong.
U Modi u la ong ba ka Sorkar ka khlem ngop ha ka jingtynjuh ki soh kiba suk ban kheit hynrei ka la peit ïa ki kam kiba la sahteng la bun bun snem. U la ai nuksa da ka jingpynpoi bording elektrik sha 18,000 tylli ki shnong kiba sah ha ka jingdum. Ïa kane la leh ha ka rukom treikam kaba la buh da ka por katkum ka jingpynbna ba la ai na Red Fort. Ïa ki dak jong ka pule puthi, ka koit ka khiah bad ka jingsuk ha ka jingim la kyntiew ha 110 tylli ki distrik kiba dang sahdien. Ka prokram Aspirational District ka la wanrah jingkylla ha kine ki distrik. Kine ki distrik ki dei kiba bun tam ki riewlum, u la ong. “Ïa ka jingseisoh jong ka prokram Aspirational District mynta la pynïar lyngba ka prokram Aspirational Block”, u la ong.
U la ong, “Ka jingplie lad ban ngeit ha kano kano ka niam ka wan tang haba ngi pynduh jait ïa baroh ki lad ban peit bein ïa kino kino ki briew jong ka ri,” da kaba bynrap ba ka hok ha ka imlang sahlang ka wan tang haba baroh ki ïoh ïa ki jingmyntoi na ki skhim Sorkar ha kajuh ka rukom. Kane ka dei ka mynsiem jong ka ‘Viksit Bharat Sankalp Yatra’ ka ban bteng haduh ka 26 tarik u Kyllalyngkot ha une u snem ban wan bad kaba sdang mynta ka sngi ha ka Jayanti jong u Bhagwan Birsa Munda. “Ha kane ka jingïaid lynti, ka Sorkar kan leit sha baroh ki shnong jong ka ri bad kan pynlong ba man u briew uba shem jingeh bad uba duk ba suk un ïoh jingmyntoi na ki skhim Sorkar,” la ong u Myntri Rangbah Duh.
U la kren shaphang ka jingpynlong ïa ka Gram Swaraj Abhiyan ha u snem 2018 ha kaba la phah shi hajar ngut ki ophisar sha ki shnong ban ai jingtip shaphang hynniew tylli ki skhim ba kongsan jong ka Sorkar bad u la ong ba u ngeit skhem ba ka Viksit Bharat Sankalp Yatra kan long kaba seisoh kumne kumjuh. “Nga khmih lynti ïa ka sngi ha kaba baroh kiba duk ba suk ki don ka card reshon ban ïoh ei ïa ka bam, ka gas connection na ka skhim Ujjwala, ka bording elektrik kaba poi sha ka iing jong ki, ka um kor ha iing, ka Ayushman Card bad ka iing kaba bha,” u la ong. U Myntri Rangbah Duh u la batai ruh shaphang ka jingthmu jong u na ka bynta ki nongrep bad ki nongbylla kiba ïoh ïa ka bai bam tymmen bad ki samla kiba shim bynta ha ka Mudra Yojna ban pynurlong ïa ki jingthmu jong ki. “Ka Viksit Bharat Sankalp Yatra ka dei ka jingpynthikna u Modi ïa ki ba duk ba suk, kiba shem jingeh, ki longkmie, ki samla bad ki nongrep jong ka ri,” u la ong.
U Modi u la ong ba ka nongrim kaba kongsan na ka bynta ka India kaba la kiew shaphrang ka dei ka PM JANMAN lane ka PM Janjati Adivasi Nyaya Maha Abhiyan. U la ong ba kadei ka Sorkar jong u Atal Bihari Vajpayee kaba la wanrah ïa ka tnat kyrpang ïa ki jaitbynriew riewlum bad kaba don la ka jong ka bynta ha ka mang tyngka. U la ong ba ka mang tyngka na ka bynta ka bha ka miat jong ki riewlum ka dei kaba la kyntiew 6 shah haba ïanujor bad ki por kiba la dep. U Myntri Rangbah Duh u la ong ba hapoh ka PM JANMAN, ka Sorkar kan ai jingïarap ïa ki riewlum bad ki jaitbynriew kiba sahdien kiba dang bun kiba sah ha ki jaka khlaw. U la ong ba ka Sorkar ka la lap 75 tylli kine ki jaitbynriew kiba don da ki lak kiba sah ha palat 22 tylli ki shnong hapoh ka ri. “Ki Sorkar mynshuwa ki la trei ban ïoh ïa ki jingkhein hynrei nga kwah ban pynïasoh ïa ki jingim, ym ki jingkhein. Da kane ka jingthmu, ka PM JANMAN ka la sdang mynta ka sngi”, la ong u Myntri Rangbah Duh. U la pyntip ruh ba ka Sorkar Pdeng kan pynlut haduh T 24,000 klur ha kane ka campaign kaba heh.
U la ai jingsngewnguh ïa ka President Droupadi Murmu kaba la ieng skhem na ka bynta ka roi ka par jong ki riewlum. U la ong ba ka dei kaba ai mynsiem ïa ka roi ka par kaba ïalam lynti da ki longkmie. U Myntri Rangbah Duh u la kren shaphang ki sienjam ba la shim ban pynythikna ïa ka roi ka par ba ïalam lynti da ki longkmie ha kine ki snem ba la dep. “Ka Sorkar jong ngi ka la wanrah ïa ki skhim na ka bynta ki longkmie da kaba peit ïa baroh ki bynta jong ka jingim jong ki,” u la ong da kaba bynrap ba ki sienjam kum ka Beti Bachao Beti Padhao, la ki jong ki paiñkhana ïa ki khynnah kynthei ha ki skul, PM Awas Yojana, ka jingplie ïa ki Sainik School bad Defence Academy, ka jingshim 70% ki jingshim ram Mudra da ki longkmie, ka jingai jingïarap ïa ki Self-help group bad ka Narishakti Vandan Adhiniyam ki la pynkylla ïa ki jingim mynta. “Mynta ka dei ka jingleh niam kaba kyntang jong ka Bhai Dooj. Une u hymen shynrang u kular ïa baroh ki para kynthei jong ka ri ba ka Sorkar jong ngi kan bteng ban weng ïa ki jingeh hakhmat ka roi ka par jong ki para kynthei jong ngi. Ka Amrit Stambh jong ka bor ki longkmie kan don ka bynta kaba khraw ha ka jingtei ïa ka India kaba la kiew shaphrang,” la ong u Myntri Rangbah Duh.
U Modi u la ong ba ka PM Vishwakarma Yojana ka pyni ba ka Sorkar Pdeng ka ieng skhem na ka bynta ka jingplie lad ïa baroh ki sap jong ki briew ha kane ka jingïaid lynti sha ka India kaba la kiew shaphrang. U la ong ba kane ka skhim kan ai jinghikai katkum ka juk mynta bad ki atiar ïa ki paralok Vishwakarma. “Yn pynlut 13 hajar klur ha kane ka skhim”, u la ong.
Ha ka jingkren shaphang ka bynta jingsiew kaba 15 jong ka PM Kisan Samman Nidhi kaba la pyllait mynta ka sngi, u Myntri Rangbah Duh u la ong ba palat T 2,75,000 klur ka dei kaba la phah sha ki account jong ki nongrep haduh mynta. U la kren ruh shaphang ka Kisan Credit Card na ka bynta ki nongri jingri bad ki nongri dohkha, ka jingpynlut haduh T 15,000 klur da ka Sorkar na ka bynta ka jingai dawai tika ïa ki jingri, ka jingïarap pisa hapoh ka Matsya Sampada Yojana ban kyntiew ïa ka kam ri dohkha bad ka jingseng jong 10 hajar tylli ki Farmer Produce Union ba thymmai ha ka ri kaba la ïalam sha ka jingpynduna ka jinglut jingsep jong ki nongrep da kaba plié lad shuh shuh sha ki iew. U Myntri Rangbah Duh u la kren ruh shaphang u snem 2023 ba rakhe kum ka International Millet Year bad ki sienjam jong ka Sorkar ban pynpoi ïa ki Shri Anna sha ki iew ha kiwei kiwei ki ri.
U la ong ba ka roi ka par jong ka Jharkhand ka la wan namar ka jingduna ki kam pyntriem Naxalite ha ka jylla. U la ong ba shen ka jylla kan sa dap 25 snem bad kumta u la kyntu ïa ka jingpynpoi salonsar ïa 25 tylli ki skhim ha Jharkhand. U la ong ba kane kan pynstet shuh shuh ïa ka roi ka par jong ka jylla bad ka jingsuk ha ka jingim. “Ka Sorkar ka ieng skhem na ka bynta ka jingpynïar ïa ka pule puthi bad ka jingplie lad ïa ki samla,” la ong u Modi ha kaba u la kren ruh shaphang ka national education policy kaba plié lad ïa ki samla ba kin ïoh jinghikai shaphang ki kor bad ka engineering ha ka ktien tynrai. U la ong ba ha kine ki 9 snem ba la dep la seng palat 300 tylli ki skul bah bad 5,500 tylli ki kolej ba thymmai ha kylleng ka ri. U la kren ruh shaphang ka Digital India campaign bad ka jingkiew ka India sha ka kyrdan kaba lai ha ka ïoh ka kot ha kaba don shi lak tylli ki start-up. U Modi u la kren ruh shaphang ka jingplie paidbah ïa ki hostel ba thymmai ha IIM Campus ha Ranchi bad IIT-ISM, Dhanbad.
Ha ka jingpynkut ïa ka jingkren jong u, u Myntri Rangbah Duh u la ong ba u ngeit skhem ba ki saw tylli ki Amrit Stambh jong ka Amrit Kaal kiba long ka bor jong ki longkmie, ka bor jong ki samla, ka bor jong ki kam rep bad ka bor jong kiba duk ba suk jong ka ri kin kyntiew ïa ka India sha ki kliar kiba thymmai bad kin pynkylla ïa ka India sha ka ri kaba la kiew shaphrang.
U Lat ka Jylla Jharkhand, u C. P. Radhakrishnan, u Myntri Rangbah ka Jharkhand, u Hemant Soren, U Myntri Khynnah ka tnat Tribal Affairs, u Arjun Munda ki la ïadon lang ha kane ka sngi ha ryngkat kiwei kiwei.