Shillong, Naiwieng 15 : U Deputy Chief Executive Member (Dy CEM) jongka KHADC u bah Pynshngain N Syiem u la ïathuh mynta ka Sngi Balang ba ka EC ka la bthah ïa ka Delimitation Committee (DC) ban ai kloi ïa ka kaiphod khnang ban ïoh shong bishar da ka EC.
U la ïathuh “ Ka KHADC ka la ïoh pdiang bun ki aplikeshon bad la bthah ïa ka DC ba kan shong bishar halor kine ki aplikeshon bad ban ai kloi ïa ka kaiphod sha ka EC.
Ka KHADC ka la thung ïa ka DC naduh ka 26 tarik Risaw 2023 ban bishar na ka bynta ban pynïaryngkat ïa ki jingeh jong ki Constituency.
ïa ka DC la khlieh da u Nongbishar ba la Shongthait jong ka ïing Bishar ka District Council Dr S Kharsyiemlieh bad ki dkhot ki kynthup ïa u Dr S.L Marbaniang ex MLA, R.Myrboh Nonghikai ba la shongthait, Dr DRL Nonglait Prof NEHU (Khasi) bad u Secretary bah M Kharkrang Secretary ba la shongthait ka KHADC.
Kane ka Committee kan shong bishar halor ki 15 tylli ki jingthoh ba la ïoh pdiang na ki shnong kiba kyrpad ban pynkynriah ïa ki na kawei ka constituency sha kawei pat. Halor kane ka DC kan hap ban bishar ïa ka jingdon ki nongshong shnong bad kumjuh ruh ïa ka jinglong jongka jaka la ka ïahap ne em ban pynïasoh sha kiwei pat ki constituency.
