Takraiñ ka KSU ïaka tnad Infiltra-tion bad Labour ba ioh wan bylla sahuh ki bar jylla khlem Licence

Nongpoh, Jymmang 13: Ka KSU North Khasi Hills District ka la pynrem jur bad takraiñ ïaka sorkar jylla khamtam ïaka tnad Infiltration bad Labour Department ba kam lah ban tehlakam ïaka jingwan rung kyrthlep jong ki bar jylla kiba ioh ban wan rung bad mih bad ban wan trei sahuh katba mon ha kane ka jylla khlem da talasi ïaki kot ki sla ba ki dei ban pynbiang lada ki kwah ban wan trei sha kane ka jylla.
Naka liang ki nongïalam ka KSU North Khasi Hills District kila pynpaw pyrthei ruh ïaka jingbymler ka jingtreikam ka tnad Infiltration bad Labour Department dei hadien ba naka liang ka seng kala leit ban talasi ïaki kot ki sla jong ki bar jylla kiba leit ban trei bylla ha ki karkhana ha MIDC Umiam bad lap ruh ba da ki spah ngut kiba leit trei ha katei ka karkhana kim don ïaki kot ki sla ba biang bad pynkheiñ ïaka Inter-State Migrant Workmen (Regulation of Employment and Conditions of Service) Act 2011.
Ka seng kala pynrem ruh ïa ka jingbymler kam ka Infiltra tion Check Gate bad ki Inspec tor kiba lah thung daka sorkar lyngba ka aiñ Inter State Migrant Workmen (Regulation of Employment and Condition of Service) Act 2011 ha kaba kine ki Inspector kin don ha man ki Community and Rural Develop ment Block ki ban ioh ban leit sha kum kine ki jaka ban leit khynra ïaka Work Permit. Ka jing bym trei kam jong ka Labour Department ka pynlong ïa ka seng KSU ban shim ïa kane ka sienjam ban khynra work permit naduh ba lah long aiñ ka Workmen Act.
Naka liang ka seng kala maham tyngeh ruh ba nangne shakhmat kan ym shong kli kti ban khynra naphang ïaki bar jylla kiba ban wan trei khlem ki kot ki sla kiba biang, namar lyngba ka jingwan rung kyrthlep jong ki bar jylla kiba khlem kot khlem sla ka lah ruh ban wanrah shibun ki kam sniew khamtam ha kitei ki karkhana bala ju don ruh ki bar jylla kiba ju pyrshang ban thombor ïaki khasi bad ki kynthei khynnah.