Nongstoiñ, Jymmang 13: U ‘lap bah ‘lap san u ba la neh katto katne kynta hynne ka step, u la pynshlei ïa ki wah kiba don ha kylleng ka West Khasi Hills District bad wanrah ruh ïa ka jingshah ktah jong ki ïing ki sem, ki dukan, ki jingthung jingtep bad ka la don ruh ka jingthut ha ka leit ka wan bad ka ïaid ka ieng ki paidbah.
Ha sor Nongstoiñ, ki ar tylli ki wah kiba don hapdeng sor kata ka wah Nonbah bad wah Nondeiñ ki la shlei biang mynta ka kynti, kat haduh ba ka la ktah jur ïa kito khamtam ki ïing kiba don ha ki rud wah. Bun ki ïing ki la shlei um bad ka jingshah lynshop na kane ka jingjia ka la jur bha. Pynban watla katta ruh kam shym don kano kano ka jingmynsaw ne shah ktah ki mynsiem briew.
Ha Kynshi ka jingther ‘lap bah ka la ktah ym tang ïa ki ïing briew hynrei ïa ka leit ka wan jong ki kali kiba thmu ban hiar sha Nongstoiñ bad kiba kiew sha Shillong. Ha kane ka jingjur slap, ka wah Kynshi ka la shlei bad tap lup ïa ki katto katne ki ïing briew, ki skul bad kiwei kiwei.
Ha ka surok na Nongstoiñ sha Mawkyrwat, ka la don ka jingtwa khyndew ba malu mala, namar katei ka surok ka don mynta hapdeng ka jingshna. Hynrei, ka la ktah pat ïa ka jingïaid beit ki kali khamtam ki kali rit kiba dei ban pynpoi ïa ki briew sha ki shnong bapher bapher.
Na ka liang ki bor pynïaid District ki la buh ruh ka jingmaham sha baroh ki paidbah nongshong shnong, khamtam kito kiba shong ba sah ha ki rud wah, ba kin long kiba phikir bha ïalade namar u slap u lah ban nang jur.
