Yn mih sa kawei ka Political Party thymmai shuwa ka elekshon 2023

Shillong, Jymmang 11: Ka Jylla kan sakhi sa kawei pat ka Party thymmai kaban mih pyrthei khyndiat bnai shuwa ka elekshon sha ka Iing Dorbar Thawaiñ ka jylla kaban long la kumno kumno ha u Rymphang – Lber jong u snem ban wan.
Ki tyllong khubor kiba tikna ki ïathuh ba ïa katei ka kynhun ym dei satia kaba thaw da ki heh spah lane ki kynhun jong ki riew paidbah hynrei kadei beit da ki MLA kiba don lang mynta ha ka sorkar synrop jong ka Meghalaya Democratic Alliance (MDA).
Ki khubor ki ïathuh ruh ba ka la don katto katne sien ka jingïakynduh halor katei ka phang ban ïa kren kumno ban pyntyllun shakhmat ïa ka kam.
Na ka liang u Mawphor haba pyrshang ban ïa kren bad uwei na ki dkhot jong katei ka kynhun um shym la treh satia ban kren ei ei ne ban kubur ba ka don kum kata ka jingpynkhreh ban thaw ïa ka party thymmai.
Ha kajuh ka por la ïoh jingtip ruh ba haduh mynta ka jingïakren ka dang ïaid shwa tang hapdeng lai ne saw ngut ki MLA watla ka thong jong ki ka long ban ïoh khring khambun shuh shuh.
Kane ka jingkhihwin ban thaw party thymmai kadei ruh ha ka por ba ka ki nongïalam na kiwei pat ki party ki dang thnem bha ban leit pynïasoh sha ka NPP ne sha ka UDP kiba dei ki ar tylli ki party ba hakhmat eh ha ka sorkar synrop jong ka MDA.
Kumban shu kdew hangne, tang mynta u snem ki la don haduh ar tylli ki party kiba mih thymmai, kata ka Voice of the People ba ïalam da u Bah Ardent Miller Basaïawmoit bad kawei pat ka dei ka All India Trinamool Congress ba ïalam da u Dr. Mukul Sangma, Myntri Rangbah barim ka jylla.