Shillong, Jymmang 12: Baroh ki seng saiñ pyrthei kiba iatreilang ha ka sorkar synrop Meghalaya Democratic Alliance (MDA) kila pynpaw ïa ka dak ka jingkyrshan ïa ka soskular (Memorandum of Understanding) bala iasoi hapdeng ka Sorkar Meghalaya bad Assam ban pynbeit noh ïa ki jingïakajia ha ki 6 tylli ki jaka khappud.
Kane kala paw ha ka jingïalang jong ka Meghalaya Democratic Alliance Coordination Committee (MDACC) ba la pynïaid da u Myntri Rangbah ka Jylla Conrad Kongkal Sangma hynne ka sngi palei.
“Ym shym la don mano mano ruh na ki paralok ba iatreilang ha ka sorkar MDA ba kwah ban shong bishar biang (revisit) ïa ka MoU” ong u Myntri Rangbah ka Jylla haba ïakren bad ki lad pathai khubor hadien ka jingïalang.
U Myntri Rangbah ula pyntip ïa kane halor ka jingkylli ki lad pathai khubor la ka don ne em ka jingdawa na ki seng saiñ pyrthei ba iatreilang ha ka MDA ban shong bishar thymmai biang ïa ka MoU bala iasoi da ki ar Jylla, kaba la don mynta ha ka Ministry of Home Affairs (MHA).
Kat kum ka jingïathuh jong u, “Ka jingïalang kala ïakren ïa ki kam khappud halor ki jingsngewkhia bala pynpaw da ki paralok hynrei kam shym la don satia ka jingai jingmut ban khyllie kitab biang ïa ka MoU”.
“Ngi la ai ka jingpynshai ïa ki halor kane ka kam bad sngew ruh ba ngi dei ban pynshai sha ki. Ngi la ju pynshai ruh ïa kiha ki jingkynduh shimet ruh bad ym shym la don satia kano kano ka jingpynsngew ba ki sngewkhia ïa ka MoU” ong u Myntri Rangbah ka Jylla.
