Shillong, Jymmang, 12: Ka Hill State Peoples Democratic Party (HSPDP) ka don mynta hapdeng ka umdum bad ka jingbym shai hadien ba ki khubor hamsaïa ki la pur stet bha ba ki arngut ki MLA ka Party kiba kynthup ïa u MLA na Mawkyrwat Constituency u Bah Renikton L. Tongkhar bad u MLA na Sohiong Constituency u Bah Samlin Malngiang ki la thmu ban phet noh na ka HSPDP hashwa ka Ilekshon 2023.
Ki khubor hamasaïa ki la pur stet ha kine ki khyndiat sngi ba u Bah Renikton un leit pynïasoh sha ka UDP katba u Bah Samlin un leit pynïasoh sha ka NPP.
Ha ka jingïakren bad ki lad pathai khubor ha ka sngi Palei, u Bah KP Pangniang u la ong, “kum ka party ngim sngewphylla shuh ïa kine ki jingjia bad kum ka party ka ieh hi ha ka jingstad jong ki. Ka party ka la leh ïa kaba bha tam. Nga ladep pynsngew ha ki, lada kim don shuh ka jingsngewtynnat ïa ka party ruh ne ïoh lehse ka don ka daw ba ka party ka lehbeiñ ïa phi ruh ne phi thmu ban leit shawei ruh balei ban da sngewlehraiñ ban ïathuh ïa ngi. Ngim don eiei ban sngewsih bad ngim don eiei kaba lah ban khang ïa ki ruh. Ka shong ha ka mon jong ki. Hynrei haduh mynta hi kim shym pat ai kano kano ka khubor kaba shai.”
“Da lade hi ruh nga la pyrshang ban kylli na ki, la phi dang skhem ha ka party ne phin mih noh. Nga la ai jingmut ruh ba lada ki kwah ban mih noh na ka party kan jin da la bha ba kin ai jingtip noh kham kloi khnang ba ngin ïoh pynkhreh bha ïa ka party,” ula ong.
“Hynrei haduh mynta ki ong beit Em,” la ïathuh une u nongïalam ka HSPDP.
Kat haduh mynta ka HSPDP ka la nang pynkhreh shaid shaid ban sei ïa ki kyrtong ha rilum Khasi bad Jaiñtia da kaba pynskhem ïa ki Block bad ki Circle.
