Shillong, Risaw 18 : Ka United Democratic Party (UDP) kawei na ki Seng Riewlum kaba rim bad khlaiñ ha kane ka ri lum Khasi bad Jaintia mynta ka kynti ka la khring bha ïa ki briew ban pan tiket ïakhun MP bad MDC na ka namar ki ïohi ba kane ka party ka la nangkiew nangkiew hangne ha ri lum Khasi bad Jaintia khamtam lada bishar na ka result jongka election MLA kaba la dep.
Mynta ka kynti na ka bynta kane ka election MP Lok Sabha na kane ka Shillong Parliamentary Constituency la paw kyrteng lai ngut kiba kwah ban ïakhun na ka UDP. Uwei u dei u General Secretary ka Party hi uba dei u MLA ba rim ka Nongthymmai u Dr Jemino Mawthoh bad uwei pat u dei u bah P.T Sawkmie Vice President bad MLA ba rim na ka Mawlai Constituency. Hynnin ka sngi la paw sa ka kyrteng u bah Robertjune Kharjahrin uba dei u President ba rim ka HYC.
Napdeng kine lai lada bishar ha ka saiñ pyrthei kiba la ih bad biang bha ha kane ka lympung ki dei u Dr Jemino bad u bah P.T Sawkmie namar kine ki la don la slem bha ha ka saiñpyrthei. Hooid u bah Kharjahrin u dei u nongïalam Seng Bhalang bad lehse um pat da shemphang bha ha ka saiñ pyrthei kumba long kitei ki arngut.
Mynta ka sngi haba ka kyrteng jongu ka la paw ba u thmu ban pan tiket na ka UDP, kiba bun ki nongkyrshan bad ki nongïalam jongka UDP ki la pynpaw ba ki thrang hi ba ka party kan ai tiket da ki briew jongka party kiba la ih bha ha ka saiñ pyrthei. La ïoh jingtip ba ki don ki nongïalam kiba la phah da ki SMS bad ki WhatsApp ruh sha ki para nongïalam halor kane da kaba ki pynpaw ba ki kwah da ki briew kiba napoh ka party.
Ka jingkylli na kiba bun ba lang ka long hato ka UDP kan ai da ki briew kiba la ih napoh ka party ne kan ai ïa kiba na bar kiba tang ban pynïasoh bad ka party ruh kim pat dep satia.
Ki nongkyrshan ka UDP ki phai khmat mynta sha ki nongïalam ka party lada ki ïeng ha kata ka nongrim ban phai shwa sha kiba la don lypa hapoh ka party nalor kiba la biang ban mihkhmat sha Delhi ka la dei ban jied uwei napdeng ki arngut. Hynrei lada ki nongïalam kim phai sha ki nongrim ka party lehse lada bakla ka lah ban kyrtoh kylla ïa ka UDP ha ka election MP namar ym lah ban len kumba ka UDP ka bun ki MLA ha kane ka kynti ka don ka jingkyrmen ba kan rah ïa ka thong jingjop nangne na ri lum Khasi bad Jaintia.
