Women Football League: Pynliem ka PFR FA ïa ka Onside Sports, ïakhaid ka Lumparing-Nongkohlew

Shillong, Jymmang 10: Ka lympung ïalehkai Women Football League ba pynïaid da ka Shillong Sports Association (SSA) kala wanphai biang ha ka sngi Ba-ar hadien shi taïew ka jingsangeh ïalehkai na ka jingdon ka Meghalaya Games 2022 kaba dang shu kut ha ka sngi Thohdieng jong ka taïew ba dang shu dep.
Ha kane ka sngi ki saw tylli ki team kiba la mih madan ki kynthup ïa ka PRF Football Academy, Onside Sports, Lumparing SC bad ka Nongkolew SC.
Ka PFR Football Academy kala khur jingjop da kaba pynliem da 1-0 pyrshah ïa ka Onside Sports na ka Group A ha ka jingïalehkai kaba nyngkong katba ka Lumparing SC bad ka Nongkolew SC kila hap ban ïasam mar shi point hadien ba kila ïakhaid da kaba thep mar shi kol.
Haba phai sha ka jingïakhun kaba nyngkong, ka Mevareen Lynnong kala thep shi kol na bynta ka PFR Football Academy ha ka minit ba 19 jong ka kylla step bad haduh kaba kut jong ka jingïakhun ka la jop da 1-0.
Ha ka jingïakhun kaba ar jong kane ka lumpung ha kane ka sngi Ba-ar, ka long kaba ïakhaid bad mar ïabiang bor bha ha ka liang ka jingïathep kol. Dei ka Lumparing SC kaba la lamkhmat nyngkong lyngba ka kol bala thep da ka Barishisha Kharkongor ha ka minit ba 32 hynrei tang hadien saw minit ka Barina Marbaniang (36min) kala thep ïa ka kol pynïakhaid na bynta ka Nongkolew SC. Lyngba kane ka jingïakhaid kine ki ar tylli ki team kila ïasam mar shi point na ka Group B.
Ha ka sngi Balang ka jingïakhun kaba nyngkong kan long na ka Group B hapdeng ka Nongthymmai SC pyrshah ïa ka Maw-U-Tieng ha ka por 1 baje nohphai sngi katba ha ka Group A ka Laitkor SC kan ïakhun pyrshah ïa ka Thynroit SC ha ka por 3:30 baje janmiet. Baroh arsien ki jingïalehkai yn pynlong ha madan MFA, Third Ground, Polo, Shillong.