Shillong, Jymmang 10: Ka Nongdawah CC bad ka Cricket Lovers kila khurj jingjop hala ki jingïalehkai District League T20 Cricket Tournament 2022 ba pynïaid da ka Shillong Cricket Association ha ka jingïaleh-kai ha ka sngi Ba-ar.
Ka Nongdawah CC kala pynliem da 7 wicket pyrshah ïa ka Sohra Combine ha ka jingïalehkai kaba nyngkong katba ka Cricket Lovers kala khur jingjop da kaba pynliem da 106 ron pyrshah ïa ka Pomshutia CC ha ka jingïalehkai kaba ar.
Haba phai sha ka jingïalehkai hapdeng ka Nongdawah bad Sohra Combine, ka Nongdawah CC kaba la jop ïa ka jingkynting pisa kala ailad tied nyngkong shwa ïa ka Sohra Combine bad kane ka kynhun ka khlem lah ban kamai ron ha kaba kala shah pynhap lut baroh ki wicket da kaba kamai tang 78 ron ha ki 14 over.
Dei tang u James Marbaniang u kamai 22 ron na ki 21 ron bad u Rilanstar Dkhar jong ka Nongdawah CC marwei u khur 4 wicket ai kamai 17 ron ha ki 3 over.
Ïa ka jingïalehkai hapdeng kine ki ar tylli ki team la pynhiar noh sha ka 15 over shiliang na ka daw ka jingpynthut ki bor ka mariang.
Haba wan beh ïa katei ka thong bala buh shakhmat, ka Nongdawah CC kala lah ban poi sha ka thong da 79 ron tang ha ki 11 over bad duh noh 3 wicket. Ïa ka nam Player of the Match la ïoh da u Rilanstar Dkhar.
Ha ka jingïakhun kaba ar, ka Pomshutia CC kala jop ïa ka jingkynting pisa bad kala kam ban kawang bol nyngkong. Ka Cricket Lovers kaba la wan ban tied nyngkong kala lah ban ïalehkai bha ha kaba kala buh ka thong kaba biang tam da 230 ron duh noh 4 wicket ha ki 20 over.
Ki don arngut ki rangtied kiba la kamai bun ron ba kynthup ïa u Rohit Kumar Yadav marwei u kamai 88 ron na ki 59 bol bad u Riboklang Hynñiewta u kamai 60 ron na ki 31 bol.
U Aristerwell Suting u ïoh 1 wicket ai kamai 40 ron ha ki 4 over na bynta ka Pomshutia CC.
Katei ka thong bala buh da ka Cricket Lovers kala pynlong ïa ka Pomshutia ban buh jingeh ban beh ha kaba ka khlem lah ban kawut na ka jingtbit ki nongkawang bol kamai tang 124 ron duh noh 8 wicket ha baroh 20 over.
Dei tang u Night Star Khongtani uba kamai bun ron da 27 ron na ki 21 bol. U Riboklang Hynñiewta jong ka Cricket Lovers u khur 2 wicket ai kamai tang 8 ron ha ki 4 over bad u Mehraf Sarkar u khur 2 wicket ai kamai 24 ron ha ki 4 over.
Ïa ka nam Player of the match la ïoh da Riboklang Hynniewta jong ka Cricket Lovers.
