Mairang, Risaw 04: President jong ka VPP, u Bah Ardent Miller Basaïawmoit, u la ong ba ki don katto katne ki MLA kiba hadien ba ki la ïohi ba ki don ki nongkyrshan jong ki kiba la leit sha ki jingïalang ka VPP bad ruh ban pynrung dkhot sha ka Seng mynta ki la byrngem ban pynduh jingïarap ïa ki na ka skhim MLA.
Ïa kane u MLA ka Nongkrem, u la ïathuh haba kren ha ka jingïalang jong ka Seng ha Nongkhlaw bad ha Umthlong kaba la long mynta ka sngi ba la pynlong da ka VPP Mairang.
Hynrei u Bah Ardent u la ong ba ki paidbah kidei ban sngewthuh ba ka skhim MLA kam dei ka pisa jong ki MLA shimet, hynrei kadei ka skhim ne ka jingïarap ba la mang da ka sorkar na ka bynta ki paidbah lyngba u MLA bad u MLA udei tang u nongpynbhah. “Ka Skim MLA kam dei ka nongmei nongpa jong u MLA, hynrei kadei ka jong phi u paidbah”, la ong u Bah Ardent.
U la kyntu ïa ki paidbah ba kim dei ban tieng, hynrei dei ban ïakhun na ka bynta ka hok ka jong ki bad dei ban nud ban kren pyrshah ïa ki MLA kiba nud ban pynduh ïa ka skhim ba la mang sha u paidbah. “Lada ngi dang bud ne kyrshan ïa ki MLA tang ba ngi tieng ba ïoh duh skhim, ka mut ngi dang shah teh mraw ha la u jong u nongmihkhmat uba ngi la jied hi ma ngi”, la ong u Bah Ardent
Ha kine ki artylli ki jingïalang, u Bah Ardent u la pynshai ruh ha kaba ïadei bad kito kiba rung sha ka Seng kum ki Active Members ha ki jingïalang bapher bapher, lehse balei ba ka Seng haduh mynta kam pat ong eiei ia ki. Hynrei u la pynshai ba ka Seng kan sa pyntip ia ki kham hadien ha kaba kin sa don ki jingïalang ha ki Constituency ha kaba kito kiba la rung dkhot kum ki Active Member ki lah ban wan.
