Ka jingdawa ithuh ktien Khasi ka dei ban rung ha ki Manifesto Election MP ki Seng Saiñ Pyrthei : Ampareen

Shillong, Risaw 04 : Ka Myntri Sorkar ka jylla, Dr. Ampareen Lyngdoh ka kyntu ïa baroh ki political party kiba pynkhreh ban aireng ha kane ka elekshon MP kaban sa long shen ba kin buh hakhmat eh ban dawa pynrung ïa ka Ktien Khasi ha ka Khyrnit kaba Phra jong ka Riti Synshar ka Ri kum kawei na ki mat ïakhun elekshon jong ki.
“Ka jingkyrpad jongnga ïa baroh ki party kiba pynkhreh aireng ha kane ka elekshon MP 2024 ba kin buh hakhmat ïa ka kum ka mat kaba hakhmat eh ha ka manifesto jong ki,” ong ka Myntri haba kren bad ki nongthoh khubor ha kane ka sngi Balang.
Kane ka Myntri kaba la leit ruh ban shim bynta ha ka jingïalang paidbah ba pynlong da ka Khasi Author’s Society ha nongbah Delhi dang shen ka la ong ba ka Ktien Khasi kadei kawei na ki 38 tylli ki jait ktien ha kaRi kiba dang ap mynta ïa ka jingmynjur jong ka sorkar pdeng ba kin ïoh rung noh ha ka Riti Synshar jong ka Ri.
“Ki political party ki dei ban kyrshan lang ban ïoh noh ïa ka jingithuh bad nga ngeit skhem ruh ba lada baroh ki seng saiñpyrthei ki kyrshan lang ngi ïoh ïa ka jingkyrshan kaba kham khlaiñ watla ngi dei ka jylla kaba rit namar ngi don tang arngut ki MP,” ka la bynrap biang.
Shwa kane, ka Myntri ka la ïathuh ruh ba ka sorkar MDA hapoh ka jingïalam jong u Conrad dang ha kine ki khyndiat bnai ki la dep ruh ban kynduh ïa u Myntri Rangbahduh ka Ri u Narendra Modi halor kiba bun ki mat kiba ïadei bad ka jylla kynthup lang ïa ka Ktien Khasi ban pynrung noh ha ka Khyrnit kaba Phra.