Kloi ka Deborah ban wallam biang ïa u Dr Mukul sha ka Congress lada ai jingbit ka AICC

Tura Risaw 3: Ka Working President jong ka Meghalaya Pradesh Congress Committee (MPCC) Deborah Marak mynta ka sngi Ba-ar, ka la pynpaw ba ka long kaba kloi ban shimkhia ha ka ban ïaleh katba lah ban wallam biang ïa u Dr Mukul Sangma sha ka seng Congress, lada ka ïoh ïa ka jingbit na ki heh jong ka All India Congress Committee (AICC).
Ka seng Congress ka la lum ïa ka jingïalang jong ki nongïalam bad ki nongkitkam ha ki Block bad ki District Committee ha Congress Bhawan, Tura.
Ha katei ka jingïalang kaba long kaba kongsan bha hashwa ban long ka elekshon Lok Sabha, ka Deborah Marak ka la ong, ba ka long kaba kloi ban trei shitom ban ïaleh ban wan ïalam biang ïa u Dr Mukul bad kiwei pat sha ka seng Congress hynrei kane kan jia, tang lada ki nongïalam kiba heh duh jong ka seng Congress ki shim ïa ka rai.
Kum ban shu pynkynmaw u Myntri Rangbah barim ka jylla u Dr. Mukul Sangma ryngkat bad ki 11 ngut ki MLA ka Congress ki la leit ban pynïasoh noh bad ka All India Trinamool Congress (TMC) ha u Naiwieng 2021, hadien ba ki nongïalam kiba ha khlieh jong ka Congress ki la thung ïa u MP ka Shillong u Bah Vincent H Pala kum u President jongka Meghalaya Pradesh Congress Committee (MPCC).
Ka Deborah ka la ïaroh ïa ki nongialam bad ki nongkitkam ka seng kiba la neh beit ha ka seng Congress watla ki nongïalam ki la mih ban pynïasoh noh bad kiwei pat ki seng saiñ pyrthei.
Ka la ong, ba ka seng kan sa khmih bniah ha ka jingpynïeng ïa ki kyrtong ha ka elekshon MDC bad ka la ong ba ki nongkitkam bad ki nongkyrshan ki la don beit bad ka seng Congress watla katto katne ngut ki nongïalam ki la mih noh.
Katba u u nongïalam ka seng Congress uba long ruh u Opposition Chief Whip, u Saleng Sangma, ula ong ba ka Congress ka dei kaba la synshar ne kaba don ha ki sorkar synroplang jong ka jylla Meghalaya hynrei ha ki 5 snem kiba la leit ka la don ha ka Liang Pyrshah, ïa kaba ka seng kam pat ju da mad ha ki snem kiba mynshwa, hynrei ka seng ka la ïoh ïa ka jingshemphang bad kan sa wanphai da kaba khlaiñ namar ba ka bteng ban ïoh ïa ka jingkyrshan kaba skhem na ki nongtrei jong ka seng bad na ki shnong ki thaw.