Ka jingbym ïasnohkti lang ki nongñiah kali ka paw ba ki sngewtynnad, ki kmen ban iaid ha ka surok NH-6 kaba la jot rathai :KSU-EJHDU

Khliehriat risaw 3: Ki nongïalam jong ka Khasi Students Union East Jaiñtia Hills District Unit, ki la pynpaw ka jingsngew khia halor ka jingbym ïashnohkti lang jong baroh ki nongñiah kali kiba ju ïaid lyngba na ka surok national highway-6 ha East Jaiñtia Hills District, ki bym burom lem ïa ka jingkyrpad ka seng, kaba la buh ka jingkyrpad ban sangeh ban ïaid kali ha ka por mynmiet kata naduh ka por 7 baje mynmiet haduh ka por 5 baje mynstep “Kane ka jingbym ïa snohkti lang jong baroh ki nongñiah kali ka paw ba imat ki sngewtynnad, ki kmen beit ban iaid ha ka surok kaba la jot rathai ruh” ong uwei na ki nongïalam ka KSU East Jaiñtia Hills.
Haba ïakren bad u Mawphor, u General Secretary jong ka KSU East Jaiñtia Hills District, u bah K.S.Suchiang, u la ong ba ha kane ka jingkyntu ïa baroh ba sangngeh ban ñiah kali la lap ba ki don bun na ki nongñiah kali ki bym treh ba ïasnohkti lang bad ka seng, namar ki don tang shi pawa kiba la ïasnoh kti lang bad ka seng ki bym iaid kali shuh ha ka por myn miet, kane ka paw ba imat ki nongñiah kali ki sngewtynnad, ki kmen beit ban iaid watla ka surok ka sniew bad jot rathai, la ong ruh ba ha ka jingshisha ka seng ka kwah eh ba baroh ki paidbah kin suk ha ka leit ka wan da kaba iaid na ka surok kaba bha ba miat bad ka seng ka ju sngap ruh ïa ki jing ud jong ki paidbah kiba ïakynduh jingeh ha ka leit ka wan bad ka seng ka la shim ruh ïa ka synjam da kaba pynlong da ki jingïakhih, hynrei balei pat ki paidbah khamtam kiba ñiah kali kim treh pat ban ïa shim bynta lang haba ka seng ka kyntu bad kyrpad ban sangeh ban ñiah kali ha ka por mynmiet?”
Utei u nongïalam ka seng, u la ong ruh ba kane ka jing kyrpad jong ka seng ban nym iaid kali ha ka por mynmiet, ka la kut noh hynnin ka sngi bad ka la dap shi taiew kynthih, kata naduh ka 25 tarik u nailur ha ka por ba pynlong jingïakhih ha Khliehriat haduh hynnin ka 2 tarik u risaw, hapoh kine ki shi taiew la ong ba ym shym la don kano kano ka jingjia ba sngewsih ne ka huri hura bad tang kawei kaba pyn pyrkhat ïa ka seng ka dei namar ka jingbym ïa shim bynta ryntih ki nongñiah kali ban sangeh ban iaid kali ha ka por mynmiet.
Haba kylli pat, sa da kano ka synjam ba ka seng kan shim ban pyn urlong ïa ka jingdawa ba ka NHAI ka dei ban maramot noh mardor ïa ka surok?,utei u nongialam jong ka KSU na East Jaiñtia Hills District, u la ong ba ka seng hi kan sa shong pyrkhat biang halor kane ka jinglong jingman ka surok NH-6, kawei ba ka seng ka kwah ka dei ba ki paidbah bad ki nongñiah kali baroh kin sngewbha ban ai mynsiem lem ïa ka seng da kaba ïa snohkti lang bad ka seng ha kano kano ka por.
Kumba long mynta, ka surok national highway ha East Jaiñtia Hills District, khamtam ha ka thaiñ Narpuh ka la buh jingma bad buh jingeh bha ïa ki paidbah nongleit nongwan, ka jingdheng kali ruh ka jur bha ha katei ka thaiñ na ka daw ka jingsniew palat ka surok.