Pynbna ka Meghalaya Cricket Association ïa ka thup ki 15 ngut ki player U-19 ban ïakhun ha ka BCCI’s Vinoo Mankad Trophy

Shillong, Nailur 02: Ka Meghalaya Cricket Association hynne ka sngi ka la ïoh ban pynbna ïa ka thup kyrteng jong ki 15-ngut ki dkhot kynthup bad saw ngut ki player bujli (standby) na bynta ka BCCI’s Vinoo Mankad Trophy, kaba dei ka lympung ïalehkai kaba shi sngi (one day tournament) na bynta ki khynnah ba dang hap hapoh 19 snem shynrang.
Kane ka lympung ïalehkai kaba la tip da ka BCCI’s Vinoo Mankad Trophy kan sdang ha kine ki sngi ban wan mynta u bnai.
Kine ki rangïalehkai kiba la shah jied ha kane ka kynhun ki kynthup ïa ki katto katne kiba la lah ban ïalehkai bha – ha kane ka MCA U-19 Boys’ Inter District Tournament kaba dang shu kut shen, hadien ba ki la lah ban pynpaw ïa ka sap kaba kyrpang ba ki don hakhmat ki nongjied.
La ïoh jingtip ba ka kynhun ïalehkai jong ka Meghalaya kan sa ïoh ban shimbynta ha ki san tylli ki jingïalehkai group, bad baroh kine kan long ha Vijayawada, Andhra Pradesh, ha kaba kin sa hap ban aireng ïa kawei na ki kynhun ba khlaiñbor ka Bengal, Uttarakhand, Hyderabad, Delhi bad ka Maharashtra.
Shuh shuh, na ka liang jong ki bor pynïaid jong ka Meghalaya Cricket Association ka la rai ban pynlong ïa ka jingkilanmet na bynta ki player kiba la shah jied ha Jagiroad, Assam. Bad ïa kane yn sdang naduh ka 8 tarik u Risaw bad ka kynhun kan mih ban leit ïakhun sha kane ka tournament ha ka sngi ba bud, katba ki player ban mih bujli lada don ba mynsaw (standby) kin leit phai biang sha la ki jong ki Distrit.
Ka thup kyrteng jong ki player kiba la shah jied ban mihkhmat ïa ka Meghalaya ki long: Shubham Rasaily, Kshitij Singhania, Avinash Rai, Lensbirth N Marak, Rituraj Rabha, Angkit Tamang, Shahin Alome, Shavian Blah, Banialam J Mylliemngap, Josiah D Wanniang, Denikcheng Marak, Dingriko Marak, Bilgrak G Sangma, Charm Marbaniang, Da-u-la-biang Shangpliang
Ki Standbys: Thunun R Marak, Justin Fancon, Ferando BM Sangma, Dipankar Barua
Support staff: Sandipan Deb Nath (head coach), Mark A Laloo (assistant coach), Gregory G Syiemlieh (trainer), Hamboy Langbang (physio), Prewindsong Sangma (manager)
Ka Meghalaya kan kan sdang ban ïakhun nyngkong naduh ka 12 tarik u Risaw ha kaba kan aireng pyrshah ïa ka Bengal, nangta bud sa ka jingïalehkai pyrshah ïa ka Uttarakhand, ha ka 14 tarik, Risaw, ynda la dep katei ka jingïakhun kan sa hap ban aireng sa ïa ka Hyderabad ha ka 16 tarik u Risaw. Nantta ka pyrshah ïa ka Delhi kan long ha ka 18 tarik Risaw bad khadduh ïa ka Maharashtra ha ka 20 tarik u Risaw.