Shillong, Risaw 01 : Ki samla pule ka skulbah NEHU ki la mih ryntih ban pynkhuid ïa ki sawdong sawkun kum shi bynta ka jingrakhe ïa ka “Swachta Divas – EK Tarrekh Ek Ghanta” ka sienjam na ka bynta ban pynphriang ïa ka jingleh khuid leh suba bad pynneh ïa ka mariang, ha kane ka sngi U Blei.
Ha kane ka jingpynkhuid shnong la wan ban shim bynta palat 300 ngut ki samla pule kynthup ki nonghikai kiba la don bynta lang ha ka jingpynkhuid shnong kaba shi kynta.
Ïa katei ka prokram la wan ban donlang ruh da u Vice Chancellor ka skulbah NEHU u Prof. Prabha Shankar Shukla kumjuh u Prof SR Joshi, Registrar jong ka skulbah kiba lamkhmat ïa ka jingpynkhuid hapoh bad shabar jong ka campus.
Haba kren ha kane ka sngi u Vice Chancellor u la ong ba ka jinglehkhuid bad pynneh ïa ka mariang kam dei satia ban long tang ka kam shisngi hynrei kadei ban pynmlien ban leh ïa ka man ka por khnang ban pynneh ïa ka jingkhuid bad ruh ban pynneh pynsah ïa ka jingitynnad ka mariang.
