Shillong, Nailur, 29: Ka nongïalam jong ka Seng Congress ka Deborah Marak kaba long ruh ka Myntri barim jong ka Sorkar Jylla ha ka sngi Thohdieng ka la ong ba lada ka High Command jong ka All India Congress Committee (AICC) ka ibit ka long kaba kloi ban ïakhun ïa ka elekshon Lok Sabha na Tura Parliamentary Seat.
“Ngam lah ban ong eiei ïa mynta la ngan ïakhun ne ngam ïakhun hynrei ka shong ha ki nongïalam jong ka Party. Lada ki ibit ïa nga ban ïakhun, ngan hap ban ïakhun,” ong ka Marak ha ka jingïakren bad ki lad pathai khubor.
Ka Tura Parliamentary Seat ïa mynta ka dei kaba la mihkhmat da ka MP jong ka NPP ka Agatha K Sangma
Da kaba pynpaw ba ka Congress ka don kabu bha na Garo Hills, ka Deborah ka long ka MLA barim jong ka Williamnagar ka la ong, “lada ngi trei shitom, khlempep ka kabu ka don. Haba nga ïakhun pyrshah ïa ka Agatha nga la leh bha hynrei hadien kata ngam shym la bteng shuh ban ïakhun.”
Haba kylli, kumno ka Congress kan pynliem ïa ka NPP kaba bat ïa u lakam synshar ha ka jylla, ka Deborah ka la ong, “ka pisa hi barabor kam ju treikam. Lada ki don ha ka bor ruh, kan ym treikam. Ka saiñhima sima ka kylla manla ka sngi. Ka shong kumno ka party kan pynkhlaiñ ïalade bad kumno ngin trei shitom.”
Kane ka working president jong ka MPCC ka la ong ba ka party ka la pynkhreh ïa ka elekshon Lok Sabha. Ka la ïathuh ba ïa kane ka kam yn sa ïakren ha ka jingïalang ka ban sa long shen ha TuraCongress Bhavan ha ka 3 tarik, Risaw ha kaba baroh ki nongïalam jong ki District Congress Committees (DCCs), ki Block Congress Committees (BCCs), ka Mahila bad Youth Congress kin sa donlang.
Ha kajuh ka por, ka Deborah ka la pynpaw ïa ka jingsngewskhem ka Congress kan dang jop biang ha Shillong Parliamentary Seat.
“U Bah Vincent H Pala un dang ïakhun. Nga don ka jingkyrmen ba un jop. Ki paidbah ki dang shahniah ïa u,” ka la ong.
Ka la ong shuh shuh ba u Bah Pala kum u President ka MPCC u biang bha. “U trei na ka bynta ka party. Watla u bunkam, hynrei u pynlut por pat na ka bynta ka party. Nga ïaroh ïa u,:” la bynrap ka Deborah.
