Khliehriat, Jymmang 09: Kum shibynta ban kyntiew ia ki samla kiba don ka sap ialehkai football, ka Khasi Students Union East Jaintia Hills District ha ryngkat ka jingiatreilang bad ka Ryntih Football Club kaba lyngba ka Minerva Acadamy Punjab, kan pynlong ia ka ‘Trial’ ka ban jied ia ki rang don sap bad ia kane yn pynlong ha madan Football Khliehriat West ha ka 14 tarik u jymmang 2022.
U Sport Secretary KSU East Jaintia Hills District, u samla Shwari Ryngkhlem bad u Publicity Secretary, u samla Hamewanpynhun Ryngkhlem, lyngba u kyrwoh ki pynshai shuh shuh ba ia katei ka Trial la khot pynlong namar ba ka Ryntih Footballl Club ka khot sngewbha ia baroh kito kiba don sap ialehkai football ban wan sha kane ak Trial bad ki khynnah kiba shah jied haduh ka Trial kaba khatduh kin ioh ka lad ban leit pyntbit shuh shuh ha ki shlem ai jinghikai Football jong ka Minerva Acadamy, kaba dei kawei na ki Acadamy kaba paw ha ri India.
Ki khynnah kiba shah jied kin dei ruh ki rang ialehkai ki ban pynkhreh ban leit sha ka lympung jong ka World Cup 2034.
Kim donkam ban lut pisa ha kaba baroh naduh ka jing ai jinghikai (training), ka bam, ka jaka sah bad baroh ki jingdonkam kim donkam ban siew pisa bad kane ka dei ruh ka kabu ksiar ia ki samla don sap jong ka jylla Meghalaya.
Kiba wan sha katei ka Trial ki dei ban wanrah lang ruh ia ka syrnot sngi kha (Birth Certificate),, ka dur shiteng bad na ka bynta ki jingtip ba kham bniah ki lah ban phone ha u number 8837348828 bad 8837424797.
