Shillong, Nailur 18: Ka PFR Football Academy kaba long kawei naki shlem ai jing hikai na bynta ki khynnah haka photbal hapoh jylla, kala shah khot ban ïashimbynta haka lympung lehkai phutbol kaba la tip da ka Tezpur Challenge Cup Football Tournament, bala pyniaid daka Tezpur District Sports Association ka ba la sdang naduh 17 tarik September haduh 24 tarik Nailur, 2023 ha Tezpur, Assam.
Haba ïa kren bad u President jong ka Academy, u Bah Franky Kharumnuid u la ong, “Ka long ka kabu ïaka Senior Team jong ngi ban ïoh ïashimbynta ha kane ka lympung kaba heh kaba wan ban ïashimbynta daki Club na kylleng ka ri bad kane ka lympung, ka long ruh kum ka jing pynkhreh ïaka Senior Team ka jong ngi ha shwa ban sdang ka 3rd Division Football League jong ka Shillong Sports Association ha une u bnai u ban wan”.
“Kum ka Team kala pynkhreh bha naka bynta kane ka lympung bad ngi kyrmen ruh ban ngin poi sha ka thong. Ka jingïalehkai ba nyngkong ka jong kane ka kynhun ka dei ka Quarter Final ka ban long haka 20 tarik Nailur, 2023 ha kaba ka PFR kan sa ïakhun pyrshah ïaka Club kaba ba na Arunachal Pradesh haka por 3 baje janmiet” la ban biang u Bah Franky Kharumnuid.
Yn ïalam ïa ka kynhun da u Bah Robin Nongrum kum u Head Coach, u Amrit Rai kum u Asst. Coach bad u Franky Kharumnuid kum u Team Manager. Lashai ka sngi, ka 19 tarik Nailur, ka kynhun ryngkat bad ki dkhot nongïalam kin mih na jaka jylla na ka bynta kane ka lympung ka ban long ha Tezpur.
Naka liang jong ka Management ka kitbok kit rwiang bad kyrmen ba kin ïoh kheit ïa u soh jong ka jingjop ha kane ka lympung la bynrap u Bah Franky Kharumnuid
