Shillong, Jymmang 08: Ka Sorkar Jylla ka dang ap mynta ïa ka jingaiktien na ki Ksiang ban pynsdang noh ïa ka jing ïakren iasuk bad ka seng Hynñiewtrep National Liberation Council (HNLC).
“Ai ba ki ksiang kin sdang noh ban shong jingïalang bad hadien kane kin sa aiktien sah ka Sorkar ban tip ïa kaei kaba dei ban leh” ong u Symbud Myntri Rangbah ka Jylla Bah Prestone Tynsong haba kylli ba lano ka jingïakren iasuk kan sdang.
Halor ka jingiasoi ïa ka soskular sangeh iasiat hapdeng ka Sorkar Jylla, Sorkar Pdeng bad HNLC hashuwa ba kan pynïaid shakhmat ïa ka jingïakren iasuk, u Symbud Myntri Rangbah ula ong “Ïa mynta hi, ngam pat lah ban ong eiei ïa kane tad hadien ka jingiashong jingïalang ba saw- san sien”.
“Ta ka daw, ngi la ieh ha ka jingstad jong ki ksiang bad ki ksiang kila nang trei ïa ka kam” ula ong haba bynrap “Hynrei ngi la dep kren shai ba ka Sorkar Pdeng bad Sorkar Jylla kila shimkhia ïa kane ka kam bad sngewbha ban pyn tyllun shaid shaid noh ïa ka kam kham kloi kat kaba lah”.
Ha u bnai Lber mynta u snem, ka Sorkar Jylla kala thung ïa ka Ophisar IAS bala shongthait Bah Peter S Dkhar ban long u ksiang u ban pynïaid shakhamt ïa ka jingïakren iasuk bad ka HNLC.
Ïa u Bah Peter uba dei u Deputy Commissioner barim ka East Khasi Hills bad West Jaiñtia Hills, la iarap lang da u Adviser ka Ministry of Home Affairs (MHA) North East bad u Ophisar IPS bala shongthait u A.K Mishra.
Na ka liang ka HNLC ruh kala thung ïa u President ka seng Hynñiewtrep National Youth Front (HNYF) Bah Sadon K Blah kum u nongmihkhmat ban ïakren bad ka Sorkar Jylla.
