Nongstoiñ, Jymmang 8: Naduh ki snem ba la dep ki paidbah ki la ju lap na ka por sha ka por ïa ki symboh khaw kiba pher na ki byrni, haba ki thied na ki dukan bad haba ki lap ïa kiba kun kitei ki synboh khaw ba kham pher, ki ju pyntip ha ki heh sorkar ba kin ïarap lem ban pynshisha ha kano ka rukom ki symboh khaw ki ïapher haba u khaw u dei na ka juh ka byrni. Kumba la ju lap na ka por sha ka por ki paitbah ki kynnoh beit ba kiba kum kitei ki symboh khaw ki dei kiba la saiñ na ki plastic bad ki sa khleh lang bad u khaw na ka bynta ka ban pynbuh bad ban dup ïoh nong haba ki pynïaid ïew.
Dang ha ka sngi saitjaiñ u bah Hindro Samakha Chairman ka Raidmynsaw u la pyntip ha u nongthoh khubor, ba ki don ki paitbah nongshong shnong kiba la wan ban pyntip ha u, ba ha ka por ba ki leit shim ïa u khaw reshon, ki la lap ba ka don ka jingipher ha ka jinglong jong ki symboh khaw bad haba ki la jied ki la lap ba ki symboh ba ipher kim ïadei satia bad ki symboh khaw.
Nalor kata u la ong ruh ba bun na kitei ki paitbah nongshong shnong, ki la artatien ban shet ïa utei u khaw hynrei ha ka jingbym banse ki hap ban shet tangba ki hap ban pynlut por slem bha ban jied shuwa ban shet. Wat la katta ruh ki don shibun ki ba artatien ban bam wat haba la shet ruh.
U bah Samakha u la ong ruh ba ka jinglap ïa u ba kum utei u jait khaw ba la khleh da ki synboh kiba kham pher, kam dei shuh ka jingjia kaba dang thymmai. Hynrei, na ka por sha ka por ka la jia bad ruh haman la ki jaka kata naduh sor Shillong haduh nongkyndong. Pynban haduh mynta ka tnad treikam jong ka sorkar kaba peit ïa ka jingkhuid jingsuba kaba ïadei bad ka bam ka dih, kum ka ophis jong u Inspector of Supply, kam pat ju pynshai paitbah wat tang shisien ruh ha kaba ïadei bad ka jingkhleh lang ïa ki symboh khaw ba kham pher, kiba la pynartatien ïa ki paitbah nongbam bad kaba la pynlong ruh ba kin ym hun shuh wat ban bam ja ruh.
U la ong ba ha ka jingshisha lada utei u symboh khaw ba kham pher um dei u ba la saiñ na ki plastik bad khleh lang ha u khaw, ka sorkar ka la dei ban pynshai lyngba ki lad pathai khubor, khnang ba ki paitbah kin tip bad lada u dei u ba la saiñ na ka plastik ruh, ka sorkar ka la dei ban pynshai bad wad jingtip bniah ban lap ïa ki Kompeni kiba leh ïa kata bad ban pynshitom ïa ki.
