U Director u ai show cause notice dei ba um tip ïa ki kyndon ne ba don kiba la tieng ïa u Prah: VPP

‘Shillong, Nailur 11: Ka Voice of the People Party (VPP) lyngba u nongaiktien jong ka, u Dr. Batskhem Myrboh, ka la ong ba ka Show Cause Notice kaba 8.9. 2023, ba la ai da u Director of School Education and Literacy, Meghalaya ia i Principal jong ka Goverment Higher Secondary School, Jowai kadei kabym lah satia ba pdiang, kaba long kamkai, hynrei kaba buh jingsyier ruh ha kajuh ka por.
Ha ka kyrwoh la pyllait mynta ka sngi, ka Seng ka ong, kane ka pyni ïa ka jinglong ka bym sngewtynnad ne kaba pynlehraiñ ïa ka jingtreikam jong ki ophisar sorkar ha ka jylla. Ha ka jingshisha ki ophisar rangbah kidei ka bor treikam kaba shai bad kaba beit bha ha ka sorkar namar ka jingtbit bad ka jinglah jong ki ban treikam. Hynrei kane ka Show Cause Notice ka pyni artylli kiei kiei.
Ka Party ka ong ba kaba nyngkong ka long ba une u ophisar ba pynmih ïa kane ka Show Cause Notice kadei kaba u leh hi dalade da ka jingbymtip bha ïa ki kyndon treikam jong ka Meghalaya Services (Conduct) Rules, 2019 lane kadei ka jingleh jong i ban pyni ïa ka jinglah treikam ryngkat ka jingkhmih lynti ban ïoh jingïaroh na ki heh jong ki Party ba synshar ïa ka jylla. Ha kane ka Notice la ïohi ba une u Ophisar um shym la kdew halor ka kyndon aiu ba u Principal i la pynkheiñ tad haduh ban da khot pynshai ne khot hajir ïa i.
Ha ka jingshisha ym ju don aiñ sorkar ban pynkitkhlieh ïa ki nonghikai ne ki shakri sorkar na ka bynta ka jingleh jong ki khynnah skul kiba ym shah kynthup satia ha ka Rules jong ua snem 2019. Ka daw kaba ar pat ka lah ban dei ba une u ophisar u ai ïa kane ka show cause notice halor ka jingbthah jong kita kiba don ka shuki lane ki politician kiba don hapdeng ka jingsyier. Ka long ka bym lah ban len ba ki don bun ki politician namar ka jingai jingkyrshan ki paidbah ha kylleng kylleng ka jylla ia ka jingkhot jingwer ka seng Voice of the People Party na ka bynta ban wanrah ia ka jingsynshar kaba khuid ba suba. Kiba kum kine, ki don ka jingthmu ban pyntieng pynsmiej ïa ki paidbah da kaba wad ki lad ki lynti ban khanglad ïa kane ka jingieit ki paidbah ïa ka Seng VPP. Hynrei lada ka long kumno kumno ruh, kawei kaba shai, ka paw ba ki don ki heh sorkar ha ka jylla kibym kotbor satia, ki bym sngewthuh bad ki bym donbor.
U Dr. Batskhem, u la ong “Ngin hap kylli ka lawei kaba kumno ka ap ia ka jylla, haba don ki ophisar sorkar kiba kum kine”.
Ka Seng ka dawa ba une u ophisar udei ban weng noh shisyndon ïa kane ka show cause notice bad ha ka jingshisha udei ban panmap khlem kano kano ka kyndon ym tang na i Principal jong ka skul, hynrei na ki paidbah baroh, namar ba u thmu ban set ïa ka sur jong kiba bun balang.