Haduh 9 ngut ki MLA na kiwei ki party kin wan ïakhun na UDP ha u 2023: Metbah Lyngdoh

Shillong, Jymmang 07 : Ki la don haduh 9 ngut ki MLA na kiwei ki party kiba thmu ban wan pan tiket noh na ka United Democratic Party (UDP) ban aireng ha kane ka elekshon MLA kaban sa long shen ha u 2023, la ïathuh da u President ka Party, Bah Metbah Lyngdoh ha ka jingïalang jong ka party kaba long ha Lawsohtun ha kane ka sngi Saitjaiñ.
“Haduh mynta ki la don haduh san ngut ki MLA kiba la pyntikna ban ïakhun na ka party ha u 2023. Hynrei namar bym pat dei ka por ki hap ban ap shwa ïa ka por kaba biang lehse shibnai arbnai,” la bynrap shuh shuh u President.
Nalorkata u ong ruh ba ka jingïakren mynta ka la ïaid shaid shaid sa bad saw ngut kiwei pat ki MLA na ka bynta ba kin wan ïasoh sha ka party UDP. “Ha ka politik lah ban ïa kam 20 ngut ruh tangba ban shu ïa thok eh ym ïahap hynrei ngi dei ban kren ïa ka jingshisha.”
U Bah Metbah u ong ruh ba u ju ïohi ba don ki MDC ne ki nongïalam jong kiwei ki party ba ki rung sop sop beit beit tang bad ki bor ba hajrong. “Nga ju ong ïa kane ba lada ki nongïalam ki wan tang dalade ngin ym pdiang hynrei lada ki nongïalam ki wan bad ki paidbah kiba jied ïa ki uta u dei u nongïalam. Ka jingwan jongnga hangne mynta ruh kum u President ka long ban wan peit wan jngoh ïa phi ym tang ïa u Bah Mitchel marwei. Phi dei ki nongtreikam jong ka party kiban duh thiah duh dem ha ka por elekshon namar ka elekshon la kumno kumno ha u Rymphang ne u Lber ka la sdang,” la bynrap shuh shuh u President.
Kumban shu kdew hangne, ka UDP haduh mynta ka don 9 ngut ki MLA hadien ba ka la jop ïa ki lai tylli ki elekshon shiteng samoi ba kynthup ïa ka Shella, Ranikor bad ka Mawphlang constituency.
Katkum ki khubor ba la ïohlum, la ong ba haduh mynta ki MLA na kiwei ki party kiba la tikna ban ïakhun na ka UDP ah u 2023 ki kynthup ïa u MLA ka HSPDP na Mawkyrwat ba dei ruh u Myntri ka tnad PHE, Bah Renikton Lyngdoh Tongkhar, nangta u MLA ka Mawlai Bah PT Sawkmie, MLA ka Nongpoh, Bah Mayralborn Syiem, MLA ka Mawsynram, Bah HM Shangpliang nalor kiwei kiwei.
La ïoh jingtip ruh ba khambun kiban wan pynïasoh sha ka UDP ki dei na ka party thymmai, kata na ka All India Trinamool Congress.