Shillong, Jymmang 07: Ka All India Trinamool Congress (AITC) ba don ha Liang Pyrshah hynne ka sngi saitjaiñ kala ther tyngeh ïa ka Bharatiya Janata Party (BJP bad ka paralok ba iatreilang-ka National Peoples Party (NPP) hapoh ka jingïalam u Conrad Kongkal Sangma ba pynkiew dor kynsan ïa ka LPG Cylinder.
Ha ka kyrwoh, ka AITC kala kynnoh ba ki nongshongshnong ka Jylla Meghalaya kila im sohsat shaba palat hapoh ka jingïalam u Myntri Rangbah Conrad Kongkal Sangma bad mynta kam shym la lah ban leh eiei ïa ka BJP ka ba la ialeh katba lah ban pynïap thngan ïa ki paidbah.
Ban nang kynton ïa ki jingeh, hynne ka sngi thohdieng, ka Sorkar India kala pynkiew ïa ka dor jong ka Domestic LPG Cylinder ba 14.2 kg da T. 50, kaba la pynkiew dor ïa ka LPG Cylinder haduh T. 999.50 shi cylinder.
Haba pynrem jur ïa kane ka jingpynkiew dor, u President ka AITC Meghalaya Bah Charles Pyngrope ula ong ba kane ka dei kawei pat ka jingleh palat pud jong ka Sorkar katba ki paidbah ki dang iaksaid ïa ka jingkiew dor ka petrol bad diesel.
U MLA ka AITC na Rangsakona Zenith Sangma ula ong ba kane ka dei ka rai bym kheiñ snep shuh iano iano ruh.
Haba pynrem ïa kane ka jingkiewdor, ka MLA ka Mahendraganj Dikkanchi D Shira kala kynthoh ha Twitter da kaba ong “Kane ka Sorkar kam shym la lah biang ban leh eiei ïa ki jingeh ba mad ki paidbah na ka por sha ka por. Lano ba ka sorkar u Narendra Modi kan kyndit thiah?”.
Nalor kine ki Nongïalam, ka AITC kala pynrem bad kynthoh ha twitter “Ka dor jong ka LPG Cylinder ba 14.2kg kala kiew da T. 50 naduh mynta ka sngi. Ka sienjam kaba stad jong ka Sorkar India ba khlem sangeh ka jingiakren ba haduh katno ka don jingsngew ïa ki paidbah ka Ri India”.
Ka dor jong ka LGP Cylinder naduh mynta ka long ka long T. 999.50 shi cylinder.
Ka AITC ka ong “ka jingpynlip bording ba da ki kynta, ka jingpynkiew dor ïa ki mar ki mata, ka jingbym siew ïa ka tulop ki nonghikai, ka soskular ïapynbeit pud nalor kiwei kiwei. Ka Meghalaya kala shah ktah jur ha ka kti jong ka Sorkar MDA ba ïalam da ka NPP bad ba kyrshan da ka BJP” haba bynrap “Ka NPP bad ki paralok ba iatreilang ha ka Sorkar kin ïai long beit ki bym kheiñ briew ïa ki nongshongshnong”.
