Shillong, Jymmang, 7: Ka Don Bosco Youth Centre, Shillong ha ka sngi Saitjaiñ ka la pynlong ïa ka jingai jinghikai kumno ban jied ïa ki jingpule sha ki samla pule kiba dang shu dep thoh ïa ka eksamin Class-X bad ka Class-XII, ïa kaba la tip kum ka Career Expo 2022 ba la pynlong ha Cilia Memorial Hall, Laitumkhrah, Shillong.
Ka jingthmu haba pynlong ïa kane ka Expo ka long ban pynshlur ïa ki samla bad ban ïalam lynti ïa ki kumno ban jied ïa ka bynta kaba dei ynda ki la bteng ïa ki jingpule kiba shalor bad ban ïoh kheit ïa u soh uba thiang ha ka jingim jong ki.
Ki nongai jinghikai ha kane ka sngi ki long u Executive Magistrate Bah Tosanbha Marweiñ uba dei ruh u Extra Assistant Commissioner (EAC) uba peit ruh ïa ka tnat Elections, Revenue, Establishment, u Brother. William u nonghikai jong ka St. Emunds Shillong, ka Kong Susana Khongwir ka nongai jinghikai bad nongïasyllok, u Fr. Michael Makri uba dei u Director jong ka DBYC.
Ki don kumba 200 ngut ki samla kiba la ïashim bynta ha kane ka jingai jinghikai ha kane ka sngi. Haba kren sha ki samla u Bah Tosanbha u la kyntu ïa ki samla ba ki dei ban buh ïa ka thong ha ka jingim ka jong ki.
“Phim dei ban iehnoh shiteng por, haba iehnoh shiteng lynti phi pynlehnohei ïa ka jingangnud jong phi,” u la ong.
U Brother William u la ai ïa ki jinghikai ba kynja mynsiem khamtam na ka bynta ki samla kiba angnud ban sngap ïa ka sur khot jong u Blei ban shakri ha ka Bri Sohwaiñ.
Ka Kong Susana Khongwir ka la pynshai sha ki samla pule kumno ban sngewthuh janai haba jied ïa ki jingpule kiba shalor da kaba pyntreikam ïa ka SWOT Analysis.
U Father Michael u la ai jingmut hynreiw tylli ki mat kumno ban jied ïa ka pule ka jong ki.
Ha ka jingïakren bad ki lad pathai khubor hadien ba la wai kane ka jingai jinghikai, u Fr. Michael u la ong ba ki samla pule kiba la wan ïashim bynta ha kane ka sngi ki la ïoh jingmyntoi bad ki da pynpaw ruh ba ki dang angnud ban pynlong shuh shuh ïa kum kine ki jait ai jinghikai ha ki sngi ki ban dang wan.
