Jowai, Jymmang 07: Ka Jaiñtia Career Coaching Center (JCCC) kawei na ki jaka ai jinghikai ïa ki samla ban ïakhun ïa ki eksam wadkam kum ka DSC bad MPSC mynta ka sngi kala sdanag ïa kane ka lad ai jinghikai ei ‘Free Coaching Class’ ïa ki 100 ngut ki samla kiba la shah jied kyrpang hadien bala dep pynlong ïa ka Entrance Test.
Ïa kane ka prokram la wan ban plie da u kongsan uba dei ruh u MLA ka 2-Jowai Constituency ma Wailadmiki Shylla haka jingïalang kaba la long ha Ladthadlaboh Community Hall ba la pynïaid da ka B. Sharma ha ryngkat ka jingdonlang kiwei de ki riew rangbah lem bad ki samla pule.
Na ka liang u ma M. Syngkon Vice Chairman JCCC ula batai khyndiat shaphang ka jingthmu jong kane ka Center kaba long kyrpang eh ïa ki khun samla ban kin ïoh jinghikai khambniah halor kumno ban pynkhreh ïalade ban ïakhun ïa kino kino ki eksam wadkam la ki dei hapoh ka District, ha ka jylla bad shabar kum juh.
Shuh shuh ula pynsngew ïa ka JCCC la seng ïa ka naduh ka 18 tarik u December, 2021 bad ka batch (DSC) kaba nongkong ka la sdang ha ka 1 tarik u February 2022 haduh ka 30 April 2022, ka JCCC ka la dep pynlong ïa ka Orientation Programme na ka bynta kiba ïakhun DSC bad MPSC ha ka 21 March, 2022 ha District Library Jowai bad ha ka juh ka por ula pynsngew shaphang ki Cours bapher bapher kiba lah ban ïoh jinghikai ha kane ka Center lyngba ki nonghikai kiba la pass ha ki kyrdan.
Katba na ka liang u kongsan u kyntu ïa ki samla pule ban kin ïaishah haduh ba kut jong ka jingshah hikai, khnang ba kin ïoh shibun ki lad ki jingtip, da kaba kyntu ki samla pule dei ban long kiba mihnot ban pule kot ha ryngkat ka jingïarap lang jong ki Coaching Class kumba ka por kala dawa mynta.
Ula ai mynsiem ruh ba dei ban don ïa ka thong ha ka jingim da kaba ïaleh khlem da artatien haduh ban da jop bad ha ka juh ka por ban long kiba janai ha ka kam. Ula ai mynsiem ïa kane ka JCCC ba kan dang kiew shaphrang ha ki lad ai jinghikai ïa ki samla wad kam bad kum ka jingkyrshah ïa ka Center u ma Wailadmiki ula synñiang hadun 1 lak tyngka na ka bynta ki jingdonkam.
Kiwei de kiba ai jingkren ki kynthup ïa u Sanatan Das (Sub Regional Employment Officer, Ministry of Labour & Employment, Directorate General of Employment ka sorkar India), u Secretary ka All Hynñiewtrep People United Front (AHPUF) ma Chandame Sungoh ha kaba kane ka seng kala synñiang ruh da ki miej bad ki ben shnong haduh 8 tylli.
Hashwa kane la ïoh ka jingpule na ka ktien U Blei bad ka jingduwai na u ma B. Kharbani katba ïa ki kyntien ai khublei la ïoh da u Asst. Centre Head ma B. Samyang.
