Pdiang burom ka SSSM bad ka KSU ïa ki samla kiba la wanphai na ka Meghalaya Games 2022

Mawkyrwat, Jymmang, 07: Ka Seng Samla Shnong Mawkyrwat (SSSM) bad ka Khasi Student’s Union (KSU) ka Mawkyrwat Circle mynta ka sngi ka 7 tarik u Jymmang, 2022 ki la pdiang burom kyrpang na ka bynta ki khun samla jong ka dong ka thaiñ kiba la wanrah burom ha ka jingleit ïa shimbynta jong ki ha ka Meghalaya Games 2022 kaba la long ha Nongbah Shillong ha ki tarik 2 haduh 7 u Jymmang, 2022.
Ha kane ka sngi kum ka dak ban pdiang burom na baroh ki nongleit ïa shimbynta, na ka liang ki ar seng ka la ïoh ban pynlong ka jingïalang ba lyngkot kata na ka liang ka Seng Samla Shnong Mawkyrwat (SSSM) ka la pynlong ha Phot Umnew katba ka KSU Mawkyrwat Circle hapoh ka ophis treikam ha kaba u Assistant Secretary jong ka Environment Cell KSU Mawkyrwat Circle, u Brightstarland Khardew-saw u la pynïaid ïa ka jingïalang.
Haba kren ha ka jingïalang hapoh Phot Umnew, u President jong ka Seng Samla Shnong Mawkyrwat (SSSM), u Kitborsing Lyngdoh Marshilong u la pynpaw ka jingsngewkmen ba mynta ka sngi ki la ïoh ban pdiang burom na ka bynta ki khynnah samla kiba la mih khmat ïa ka South West Khasi Hills District bad ymtang ba ki leit ïa shimbynta hynrei ki da wanruh ruh ka nam ka burom na ka bynta ka dong ka thaiñ lyngba ka nam jingjop ba ki ki la ïoh.
“Ka jingjop jong ki, ka long ka burom nyngkong eh ïa ka ïing ka sem, ka shnong ka thaw bad ka distrik hi baroh kawei”, ong u bah Kitborsing, kumta da ka juh ka mynsiem jong ka jingieit ka Seng Samla ka ai ruh ka burom na ka bynta baroh kiba la poi sha ka thong bad kumjuh ruh ki bym poi sha ka thong hynrei ka mynsiem jingïakhun jong ki kan nang ïai rhem na kawei ka por sha kawei pat. U la ong ruh ba lyngba ka jingjop jong ki ha ka jingleit ïashimbynta, kan long sa long ka nuksa na ka bynta ki khynnah samla kiba don ka jingthmu ban kyntiew ha ki kam ïalehkai.
Ha kane ka sngi la ïadonlang ruh naduh ki nongkitkam ba shakhmat jong ka Seng Samla Shnong Mawkyrwat (SSSM) bad kumjuh ki khynnah samla.
Ha kajuh ka por, na ka liang ka Khasi Student’s Union (KSU) ka Mawkyrwat Circle ha ka program ba lyngkot jong ka ban pdiang burom ïa ki khynnah samla kiba la wanphai sha ka shnong ha ryngkat ki khusnam, da ka mynsiem jong ka jingkmen ka la pynpaw bad pdiang sngewbha ïa ki ba ka jingwanrah burom jong ki ka la long ka jingsarong ïa ka dong ka thaiñ baroh kawei.
U Iengskhem Syiemlieh, Vice President jong ka KSU Mawkyrwat Circle bad u Plosborlin Kharjahrin, EC member jong ka KSU Mawkyrwat Circle, ha ka jingkren jong ki ha kane ka sngi pdiang bad ai burom na ka bynta baroh ki nongleit ban ïa shimbynta ha kane ka Meghalaya Games 2022 la ka long ïa kiba la poi sha ka thong ne wat ki bym poi sha ka thong jong ka jingjop ruh, ki la pynpaw ba ka jingleit ban ïa shimbynta jong ki ha kane ka jingïalehkai ka la long da shisha ka jingmyntoi namar ki la pyndonkam hok ïa ki sap ba ki ki don.
Namarkata, ki la ai mynsiem ba kiba jop kim dei ban don noh ïa ka mynsiem jong ka jingsngewsarong ba ki ki la jop bad kiba rem ruh kim dei ban don noh ka mynsiem jong ka jingduh jingkyrmen, hynrei ai ba ka jingjop bad ka jingrem jong ki kan long pynban ka jinghikai ba kin sa nangïai ïa leh bha shuh shuh ha ki sngi ki ban sa wan da kaba don ka jingthmu ban poi ha ka National Level ne wat ha ka International ruh.
Kum ki khun samla haba ki dang don ha ka karta kaba dang khie san, wat shah ba ki jingsniew kiba ker sawdong ïa ki kin long ka daw jong ka jinglynshop ne jingpyntroiñ na ka bynta ka jingthmu ba ki ki don ban kiew ha ki kam ïalehkai, namar wei la ngop ha ki jingsniew tang kata ka jingthmu jong ka la troiñ lypa.