Lyngba ka Financial Literacy Camp pynsngewthuh ka Apex Bank ïa ka jingdonkam ban kynshew pisa sha Bank

Nongstoin,Nailar 31: Ka long ka jingmyntoi bad ka jingkyrkhu ia ki khynnah skul FGEM Higher Secondary School Nongspung ha kaba na ka liang ka MCAB Bank Nongstoin Branch ha ka 31.08.2023 kala wan ban pynshai paidbah ha kaba iadei kumno ban kynshew pisa sha Bank bad ban pynsngewthuh ha kaba iadei bad ki kam pisa tyngka.
Hakane ka prokram kaba la long ha poh ka skul la pyniaid ia ka jingialang da u Principal jong ka skul Bah Kyrshan Marngar ha ryngkat ka jingiadonlang ki Nonghikai bad ki Khynnah skul. Na ka liang u Principal u la pynpaw ka jingsngewnguh bad ai khublei ia ka Meghalaya Co-operative Apex Bank kaba la kner lem ki jingiarap ban pynbit pynbiang bad ban kyntiew ia ka pule puthi.
Na ka liang u Bah T.K.Wanniang Chief Manager ka Apex Bank Nongstoin Branch u la pynshai bniah shaphang ka Education Loan bad ka PMEGP na ka bynta ka jingkyrshan ia ki khynnah skul ban bteng ia ka pule puthi jong ki bad ka skhim Prime Minister Employment Generation Programme na ka bynta ban sengkam seng jam la jong namar ban ap tang ka kam sorkar ka long kaba eh.
U la ong ruh “baroh ki jait kam (Service) bapher bapher ngi donkam ia ki Bank” kumta na ka liang ka Bank ka ialeh ban ai ka jingshakri kaba bha ia ki paidbah ka thain. Kumjuh ruh u la kyntu ban Minot, ban trei shitom ha kino kino ki kam namar mynta baroh ki jait kam ka don beit ka competition.