Shillong, Nailar 31: Ka tnat ba dei khmih ïa ka kam lehkai (Department of Sport) jong ka NEHU hynne ka Sngi Palei ka la ïoh ban pynhap pyrda noh ïa ka lympung NEHU Inter College Football Men Tournament 2023 ha kaba ïa ka namlahduh la ïohrah da ka Shillong College hadien ba jop ha ka final.
Kumban shu pynkynmaw, ka Sports Department jong ka North-Eastern Hill University ka la plie pyrda ïa kane ka NEHU Inter College Football (Men) Tournament 2023 naduh ka 21 tarik u Nailar bad la khylliap pyrda noh hynne ka Sngi Palei ka 31 tarik ha madan lehkai jong ka Sports Authority of India (SAI) Football Ground, NEHU Permanent Campus, Shillong.
Haba kyllumlang baroh ki 32 tylli ki college haduh ki skul bah (University) kynthup ruh ïa ka NEHU UG & ki khynnah pule PG jong ka Shillong Campus bad Tura Campus bad ruh ki dkhot jong ki kynhun; ki la don palat 700 ngut ki nongïalehkai kiba la ïashimbynta ha kane ka tournament ba la pynlong da ka Sport Department jong ka skul bah NEHU.
Ha ka jingïakhun wat kaba khadduh jong kane ka tournament, la ïakhun hapdeng ka Shillong College bad ka St. Anthony’s College, ha kaba ka Shillong College ka la khur ïa ka namjop da 3-1 kol ban rah ïa ka namlahduh.
Ha kane ka sngi la sakhilang da u Registrar jong ka skul bah North-Eastern Hill University, u Prof. S. R. Joshi u la long kum u Kongsan ha ryngkat bad u MLA jong ka Mawlai Constituency, u Bah Brightstarwell Marbaniang kum u Symbud Kongsan. Nalor kine arngut, u Prof. L. Kma, Director In-charge, Sports Department, NEHU, u Prof. K. Debberma, Department jong ka Pol. Science, NEHU, ka Dr. (Mrs) C. Mukhim, u Chief Medical Officer cum In Charge, Health Center, NEHU bad u Raj Mallick, Deputy Registrar (Exam), NEHU bad N. Das, Asst. Director (PE & Sports) cum Organising Secretary jong kane ka tournament kiba la ïa don ryngkatlang ha kane ka sngi pynkut.
others.
La ïoh ban khylliap pyrda noh ïa kane ka Tournament lyngba ka jingsam khusnam, ha kaba baroh arngut, kata u Kongsan ryngkat bad u symbud kongsan ki la sam ïa ki khusnam sha ka kynhun ba rah namlahduh.
