Yn ïaknieh namlahduh ka St. Anthony’s College bad ka Shillong College

Shillong, Nailar 30: Ka lympung ïalehkai jong ka NEHU Inter College Football Men Tournament ba la pynïaid da ka tnat bad dei khmih ïa ka kam lehkai jong ka NEHU, hynne ka Sngi Balang ka la ïoh ban pyndep ïa ka jingïakhun semi final hapdeng ki saw kynhun, ha kaba ka St. Anthony’s College bad ka Shillong College ki la khur namjop ban ïohrung sha ka wat kaba khadduh.
Kumban shu pynkynmaw, la sdang ban plie pyrda ïa kane ka lympung naduh ka 21 tarik u Nailar kaba la pynlehkai ha madan SAI, Football Ground, NEHU Permanent Campus.
Haba phai sha ka jingïakhun ïa ka semi final jong ki saw tylli ki kynhun ba dang sah, ha ka semi final kaba nyngkong hapdeng ka St. Anthony’s College pyrshah ïa ka Seng Khasi College, kaba la long ha ka por 9 baje mynstep ka la jam sha kaba kut ha kaba ka St. Anthony’s College ka la jop da 3-1 kol.
Haba phai pat sha ka semi final kaba ar kaba la long ha ka por 11 baje mynstep, hapdeng ka Shillong College pyrshah ïa ka Edmund’s College, ka jingïakhun ka la jam sha kaba kut ha kaba ki rangïalehkai ka Shillong College ki la khur ïa ka namjop kaba suk haduh 6-1 kol ban jam sha ka final jong kane ka Tournament.
Lyngba kane ka namjop kine baroh ar kynhun kin sa ïatyngkhuh ha ka final ban ïaknieh ïa ka namlahduh ka ban long mynta ka sngi, ka 31 tarik, Nailar, 2023 ka ban long ha ka por 10 baje mynstep.