Shillong, Nailar 28: Ka Meghalaya College Teachers Association (MCTA) ka la dawa ba u Vice Chancellor ka NEHU, u Prof. PB Shukla udei ban weng noh mardor ïa ka Notification ne ka jingpynbna ba la pynmih ha ka 12 tarik u Naitung 2023 kaba ïadei bad ka jingpyntreikam ïa ka National Education Policy 2020.
“Ka NEHU kadei ban weng noh mardor ïa kane ka jingpynbna, namar dei kane ka jingpynbna kaba la wanrah ïa ki kynrum kynram ha ki College ka jylla”, la ong u General Secretary jong ka MCTA, u Dr. Airpeace Rani.
Haba ïakren bad ki nongthoh khubor ha Shillong Press Club mynta ka sngi, u Dr. Rani, u la ong ba kane ka jingpynbna ka NEHU lyngba u officer on special duty , u Debasish Chowdhury ha ka 12 tarik u Naitung kadei kaba shu thok namar ba ka Academic Council jong ka University ka khlem rai eiei halor kane.
Ka President jong ka Synjuk ki Nonghikai College ha Meghalaya, ka Dr. BH Buam, ka la ong ba namar kane ka jingsngap mynthi jong ka NEHU ki Nonghikai ha ki 22 tylli ki College jong ka Meghalaya ki la sangeh ban shim klas ïa ki First Semester kum ka dak ka jingpyrshah ïa kane ka jingleh ka University, hynrei ïa ki 3rd, 4th bad 5th Semester te ki shim beit.
Ha kajuh ka por ka MCTA ka la maham ruh ba lada ka NEHU kam weng ïa kane ka jingpynbna paidbah kim banse ban shim da kiwei pat ki lad ki ltni kiba kham tyngeh, ïa kaba kim pat kwah ban pynpaw lypa mynta.
