Shillong,Nailar 28 : U Vice Chancellor (VC) jongka North Eastern Hill University (NEHU) u Prof Prabha Shankar Shukla u la pynpaw ba u kloi ban ïakynduh bad ïakren sngewthuh bad ka Meghalaya College Teacher Assocïation (MCTA) ban ïapoi sha ka jingïasngew thuh jingmut lang na ka bynta ka lawei jong ki samla pule.
Ha ka jingpyllait khubor na ka NEHU la pynpaw na u Prof Shukla u shim ïa ka kabu ban khot ïakren ïa ka MCTA halor ka jingbteng jongki ïa ka jingïakhih da ka Non Cooperation . “ Na ka bynta ka bha ka mïat jong ki samla pule kane ka thaiñ shatei lam mihngi u kyntu ïa ka MCTA ba kan shim noh da kawei ka lynti kata ban wan ïakren noh bad u namar u kloi ban ïakren na ka bynta ka jingmyntoi jong ki samla pule namar tang lyngba ka jingïakren kaba lah ban poi sha ka jingïasngewthuh jingmut lang bad shim ïa ka rai ba ïamynjur lang” ong ka kyrwoh na ka NEHU.
Shwa ïa kane ha kane kajuh ka kyrwoh u VC u la ai ka jingïaroh ïa kito baroh ki College kiba la pynïasoh bad ka NEHU ba ki shim ïa ka rai ban pyntreikam noh ïa ka Four Year Undergraduate Programme (FYUP) kumba la pruid dak ha ka National Education Policy (NEP) 2020.
Hapoh ka jingpeit bad jingpynïaid jong u Prof Shukla ka NEHU ka la pynbna ban pntreikam ïaka FYUP Scheme kuma la pruid ha ka NEP 2020 bad ka thong ka long ban rah bad kyntiew ïa ka kyrdan pule puthi ha ka jylla kaba ïa ryngkat bad kiwei pat ki jylla. Kane ka long ruh hadien ba la sdang ïa ka 2023-24 Academic Session.
“ Kumba la sdang mynta la 45 sngi ïa ka Academic Session 2023-24 u VC u pynpaw ka jingsngew hun halor ka jingpdïang jong ki college kiba pynïasoh bad ka NEHU ïa kane ka thong ban wanrah ka jingpynkylla kaba thymmai ha ka pule puthi” ong bïang ka kyrwoh.
La pynpaw shuh shuh ba ym don kawei ruh ka college kiba kwah ban pynsangeh treikam ïa ka NEP bad kane ka pynpaw ïa ka jingthrang bad lenlade jong kine ki tnad pule ban kyntiew ïa ka pule ka puthi bad ka lawei pa phyrnai ïa ki samla pule.
U ai khublei sngewnguh ruh ïa kito ki bor pynïaid jongki college kiba la rai ban pyntreikam ïa ka FYUP scheme. U ai khublei ïa ki Principal kiba shim ïa kane ka jingkitkhlieh ban pynurlong ïa kane ka skhim.
