Shillong, Jymmang 05: Ka Seng Kur Sohkhlet, Khasi Jaiñtia mynta ka sngi ka la pynlong ka jingïalang ha Shillong ha kaba la kynmaw burom ruh ïa ki arngut ki Nongïalam jong ka Seng kiba la khlad noh ha une u snem baladep.
ïa kane ka jingïalang la pynlong ha îingdorbar Hall Mission Compound, Shillong, ha kaba ki Kur na kylle ka Ri Khasi Jaiñtia ki la ïawan lang ha kane ka jingïalang ba shisien shi snem jong ka Kur.
Ha kane ka jingïalang la pynlong ka jingkynmaw burom ïa u Bah Pyrkhat Sohkhlet uba long u Rangbah Kur ne President ba nyngkong eh jong ka Seng Kur Sohkhlet, uba la khlad noh ha ka 16 tarik u bnai Jymmang jong ka snem 2021.
Nangta la kynmaw burom ruh ïa i Kong Elda Sohkhlet, Treasurer ba nyngkong eh jong ka Seng Kur Sohkhlet, Khasi Jaiñtia, iba la khlad noh ha u snem baladep.
Ha kane ka jingïalang la pynkynmaw ïa ka jingtrei bad ka jingshakri ba khlem shongthait jong ki, ha kaba lum ba lang ïa ki Kur Sohkhlet na kylleng ka Ri Khasi Jaiñtia bad kumjuh ruh ka jingtrei shitom jong ki ban beh ban rap haman ba ki Kur ki mad ïa ki jingeh kum ha ka pang ka shitom bad ka ïap ka im.
Kum ka dak ka jingburom ïa ka jingnoh synñiang jong ki sha ka Kur, la pynkup burom da kaba ai sngewbha da ka Momento bad ka pisa. ïa kine ki jingai sngewbha la wan shim da ki khun ki kti jong kine kiba ba nongïalam ba khlad noh.
La pynlong ruh ka jingsngap jar kaba shi minit kum ka dak ka jingkynmaw burom ïa ki bad ïa kiwei de ki para Kur kiba la khlad noh ha une u snem baladep.
Ha kane ka jingïalang ba la pynïaid da u Bah RB Sohkhlet, u Rangbah Kur, la ïoh ruh ïa ka report trreikam na ki lai tylli Circle jong ka Kur, kata ka Sohra Circle, ka Riwar Mihngi Circle bad ka Shillong Circle.
La ïoh ruh ïa ka report treikam jong ka Kur Pyllun baroh kawei, kaba la pyntip ha u snem baladep ka la leh shibun ki ka, khamtam ka jingkner jingïarap sha ki para Kur kiba duk basuk, da kaba leit ai jingïarap ïa ki artylli ki longiing ba sah sah khunswet ha Kshaid, Khatar Shnong.
Ha kane ka jingïalang la pynthymmai ruh ïa ki nongkitkam na ka bynta ka samoi treikam 2022-2025. Kine ki long, Rangbah Kur- Bah Elbis Sohkhlet, Symbud Rangbah Kur- Dr. Betterland Sohkhlet, General Secretary- Bah Wellcome Sohkhlet, Assistant Secretary- Kong Binola Sohkhlet, Treasurer- Bah Aibor Sohkhlet, Auditor- Bah Jupiter Sohkhlet bad Bah Ksan Sohkhlet.
Nongaibuit: Rev DS Sohkhlet, Bah RB Sohkhlet bad Bah P. Sohkhlet.
