Shillong, Jymmang 06: Ka Kynhun Myntri ka Sorkar Meghalaya Democratic Alliance (MDA) hynne ka sngi thohdieng kala mynjur ïa ka Office Memorandum (MO) ban ai ïa ka Income and Assets Certificate ïa ki Economically Weaker Section (EWS) ne ki longïing ba duna ka ïoh ka kot hapoh ka Jylla.
Kane ka dei na ka bynta ban ai bhah ïa kine ki Longïing ba duk ban ïohkam ha ki kam Civil Post & Services ha ki Ophis ka Sorkar India bad ka jingïohkam bad ïohrung kam ha ki Institute jong ka Sorkar Pdeng, ong u Myntri Rangbah ka Jylla Conrad Kongkal Sangma haba ïakren bad ki nongthoh khubor hadien ka jingïalang jong ka Kynhun Myntri.
U Conrad ula pynkynmaw ruh ba ïa kane ka kam la rah ïakren ha ka Ïingdorbar Thaw Aiñ ka Jylla ba ïa ka Office Memorandum la dep pynmih da ka Sorkar India hynrei ka Sorkar Jylla kam pat pynmih satia ïa ka OM ba ïadei bad kane ka kam.
U Conrad u pyntip ba ka Sorkar Jylla kala nang pynjanai ïa kane bad kala mynjur ïa ka Office Memorandum hynne ka sngi thohdieng.
Kat kum ka jingon gjong u, ka Office Memorandum kan treikam tang ïa ki briew ki bym pat ïoh ïa ka skhim jong ka bhah kam ïa ki Schedule Tribe/Schedule Caste bad ruh ïa ki briew kiba wan na ki jaidbynriew ba dang sahdien.
“Namar kata, kane kan ym treikam satia ïa kiba bun ki Nongshongshnong ka Jylla Meghalaya” ula bynrap.
Haba sot ïa ki kyndon kat kum ka Office Memorandum, u Myntri Rangbah ka Jylla ula ong ba kito ki Longïing ki ba ka jingïoh kamai jong ki ka duna ïa ka T. 8 lak kin ïoh ïa ka EWS Certificate. Hynrei lada kine ki Longïing wat lada ki ïoh kamai hapoh ka T.8 lak hynrei ki don pat ïa ki jaka rep ba heh kumba 5 acre ne palat, kin ym ïoh shuh ïa kane ka certificate.
“Kumjuh ruh, lada ki don ïa ka flat ban sah ba 1000 sqft, lada ki don ïa ka ïingsah ba 1000 sqyard bad lada ki don ïa ka ïingsah ba 200 sqyard ha ki jaka bym hap hapoh ka municipal, kin ym ïoh satia ïa ka EWS Certificate” bynrap u Conrad Sangma.
