Jowai, Jymmang 06: Ka Hynñiewtrep Integrated Terri-torial Organization (HITO) Saphai Area mynta ka sngi kala leit ban ujor syndon da ka Ejahar pyrshah ïaka Dhar Company hadien ba la lap ïa ka jingbym biang ka rukom pyntrei ïa ka surok ‘Pasyih-Garampani Road’.
Ha kane ka sngi ki dkhot ka seng naduh u President samla Pynhun shulet bad u samla Melki Dhar Secretary, kila hiar ban sakhi ïa kane ha ka shnong Biar bad la lap ha katei ka bynta ba ka rukom shna ïa ka surok la i kumba shu ñiad rong halor khyndew shyiap bad ‘lada khoh da ka kti ruh la lah ban khlong noh ïa ki rong jong ka psiang’.
Halor kane ka jingleh torti ka rukom pynshna surok seng kala ïathuh nyngkong kila leit ban ujor shwa ha Raliang Police Station hynrei namar ba ki Police officer jong ka Raliang kim pat long kiba tbit halor ka aiñ bad kim treh ban pdiang ïaka FIR, kumta ka seng mar mar kala leit buh ïa ka jingujor sha SP office ha Jowai.
Na ka liang ka seng ka kyntu ruh ïaka tnad kam pohïing ba ka dei ban ai jinghikai bha ïaki pulit SI kiba dang thymmai khnang ba kin lah ban pynjanai ïa ki kam hapoh ka tnad pulit. La pyntip ruh ba ka seng ka la rai ruh ban ujor sha Lokayuta halor kane ka kam ba trei torti ïa ka surok da ka Dhar Company.
La kynnoh ruh ba ïa ka surok Pasyih-Garampani Road bala dep pynshna daka Dhar Company hynrei tang da ki bnai kane ka surok kala sniew, naka liang jong ka seng ka dawa ïaka Dhar Company baka dei ban maramot biang ïa ka surok lym kumta ka seng HITO kan ujor syndoh sha ka ïing bishar ba donburm ka High Court haba kaba ïadei bad ka jingpyntrei torti ïa ka surok.
